Իսրայելական տանկի անձնակազմը հոկտեմբերին Լիբանանում սպանել է Reuters-ի թղթակցին՝ երկու արկ արձակելով լրագրողների խմբի դեմ, իսկ հետո «հավանաբար» նրանց դեմ կրակ է բացել ծանր գնդացրից 1 րոպե 45 վայրկյան տեւած գրոհի ընթացքում, նշվել է միջադեպի մասին զեկույցում, որը հրապարակվել է հինգշաբթի։
TNO նիդեռլանդական կիրառական գիտական հետազոտությունների կազմակերպության զեկույցում, որի հետ Reuters-ը պայմանագիր է կնքել հոկտեմբերի 13-ի հարձակման (որի հետեւանքով զոհվել է լրագրող Իսամ Աբդալան) ապացույցների ուսումնասիրության վերաբերյալ, նշվում է, որ տանկը 1,34 կիլոմետր հեռվից Իսրայելի տարածքից լրագրողների դեմ երկու 120 միլիմետրանոց արկ է արձակել։
Առաջին արկն սպանել է 37-ամյա Աբդալային եւ ծանր վիրավորել 28-ամյա լուսանկարիչ Քրիստինա Ասիին (AFP-ից)։
Reuters-ը դեկտեմբերի հետաքննության արդյունքում տեղեկացրել էր, որ TNO-ն պարզել է, որ լրագրողների վրա կրակել է իսրայելական տանկը։ Իր վերջնական հաշվետվությունում ինստիտուտը նշել է, որ Al Jazeera-ի տեսանյութը վկայում է այն մասին, որ թղթակիցները գնդակոծվել են Browning գնդացիրներից, որոնք տեղադրվում են Merkava իսրայելական տանկերի վրա։
Reuters-ը ընդգծել է, որ հաջողվել է պարզել, թե արդյոք իսրայելական տանկի անձնակազմն իմացել է այն մասին, որ կրակում է լրագրողներին, եւ արդյոք կրակել է նրանց վրա գնդացրից, եւ եթե կրակել է, ապա ինչու։
Reuters-ի ողջ մնացած երկու թղթակիցներից ոչ մեկը կամ AFP-ի որեւէ լրագրող, որոնք գտնվել են պատահարի վայրում, գնդացրի կրակ չեն հիշում։ Նրանք բոլորն ասել են, որ այդ պահին գտնվել են շոկի մեջ։