Իսրայելի վարչապետ Բենիամին Նեթանյահուն երկուշաբթի երդվել է կասեցնել Al Jazeera-ի գործունեությունը Իսրայելում՝ այն անվանելով հրահրիչ նյութեր տարածող «ահաբեկչական ալիք»: Իսրայելի խորհրդարանի ընդունած նոր օրենքը ճանապարհ է բացել լրատվամիջոցի գործունեությունը կասեցնելու համար:
Հեռուստաընկերությունը դատապարտել է Նեթանյահուի՝ սադրանքի մասին պնդումը՝ այն «վտանգավոր, ծիծաղելի սուտ» անվանելով: Հեռուստաալիքը երկուշաբթի երեկոյան հայտարարել է, որ Նեթանյահուին պատասխանատու է համարում իր անձնակազմի և գրասենյակների անվտանգության համար, խոստանալով, որ կշարունակի իրադարձությունների համարձակ ու պրոֆեսիոնալ իրազեկումը, և որ իրեն «իրավունք է վերապահում ձեռնարկելու բոլոր հնարավոր իրավական քայլերը»:
Իսրայելը վաղուց վատ հարաբերություններ ունի Al Jazeera հեռուստաալիքի հետ, որին մեղադրում է կողմնակալ լինելու մեջ։ Հարաբերությունները վատթարացան մոտ երկու տարի առաջ, երբ հեռուստաալիքի թղթակից Շիրին Աբու Աքլեհը գրավյալ Արևմտյան ափում սպանվեց իսրայելական մարտարշավի ժամանակ:
Պաղեստինա-ամերիկյան լրագրողը հայտնի էր արաբական աշխարհում Իսրայելի իրադարձությունների իր քննադատական լուսաբանմամբ, և Al Jazeera-ն Իսրայելին մեղադրեց լրագրողին դիտավորյալ սպանելու մեջ:
Իսրայելը հերքել է մեղադրանքը՝ հայտարարելով, որ նա, ըստ ամենայնի, սպանվել է իսրայելական պատահական կրակոցից։
Դեկտեմբերին էլ իսրայելական հարվածի հետևանքով զոհվեց հեռուստաալիքի օպերատորը, որը հաղորդում էր հարավային Գազայի պատերազմի մասին:
Նույն հարձակման արդյունքում վիրավորվել է հեռուստաալիքի Գազայի գրասենյակի ղեկավար Վաել Դահդուհը։ Al Jazeera-ն Իսրայելին նաև մեղադրել է այս տարվա հունվարին ավիահարվածի հետևանքով Դահդուհի որդու մահվան մեջ:
