ԱՄՆ պետքարտուղարի ռազմաքաղաքական հարցերով օգնական Ջեսիկա Լյուիսը ապրիլի 4-9-ին կայցելի Թուրքիա եւ Հունաստան, որտեղ կքննարկի համագործակցությունն անվտանգության, պաշտպանական ոլորտում առեւտրի եւ տարածաշրջանային անվտանգության հարցերը ՆԱՏՕ գծով երկու կարեւոր դաշնակիցների հետ, տեղեկացրել է ԱՄՆ պետդեպարտամենտի մամուլի ծառայությունը։

Անկարայում եւ Ստամբուլում ապրիլի 4-6-ին պետքարտուղարի օգնական Լյուիսը կհանդիպի բարձրաստիճան պաշտոնյաների հետ, որպեսզի զարգացնի վերջերս ստեղծված ամերիկա-թուրքական ռազմավարական մեխանիզմը։ Պետքարտուղարի օգնականը կայցելի նաեւ զինամթերքների արտադրման թուրքական գործարան եւ կհանդիպի միջազգային պաշտպանական արդյունաբերության ներկայացուցիչների հետ, որպեսզի ընդգծի Հյուսիսատլանտյան դաշինքի պաշտպանական պոտենցիալի ամրապնդման սուր անհրաժեշտությունը։

Աթենքում ապրիլի 6-9-ին պետքարտուղարի օգնականը խորհրդակցություններ կանցկացնի պաշտպանության եւ արտաքին գործերի նախարարությունների բարձրաստիճան պաշտոնյաների հետ։ Լյուիսը կքննարկի համագործակցությունը Հունաստանի ռազմական արդիականացման առաջնահերթությունների վերաբերյալ, ներառյալ Հունաստանի կողմից ԱՄՆ-ում պաշտպանական ապրանքների ձեռքբերումը։ Նա նաեւ կքննարկի ամերիկա-հունական համագործակցությունն անվտանգության հարցերի վերաբերյալ, ինչպիսին են օգնությունն Ուկրաինային, ծովային համագործակցությունը, պայքարն ահաբեկչության եւ ծովահենության դեմ։