Հոնկոնգի ոստիկանությունը ձերբակալել է մոտ 300 մարդու՝ 2020 թվականի հունիսի 30-ից ուժի մեջ մտած Ազգային անվտանգության օրենքը խախտելու կասկածանքով։ Այս մասին հաղորդում է RTHK հոնկոնգյան ռադիոկայանը՝ վկայակոչելով քաղաքի անվտանգության վարչության հայտարարությունը։
«Հոնկոնգի ազգային անվտանգության մասին օրենքի ուժի մեջ մտնելուց ի վեր և այս տարվա մարտի 8-ի դրությամբ, ընդհանուր առմամբ 291 մարդ է ձերբակալվել ոստիկանության կողմից՝ ազգային անվտանգությանը սպառնացող գործողություններ կատարելու կասկածանքով։ Ձերբակալվածների տարիքը տատանվում է 15-ից 90 տարեկանի սահմաններում»,- հայտնում է ռադիոկայանը։
Նշվում է, որ մեղադրանք է առաջադրվել 170 կասկածյալի և 5 կազմակերպության։ Եվս 112-ը դատապարտվել են կամ սպասում են դատավճռի:
2019 թվականին Հոնկոնգում տեղի ունեցած զանգվածային հակակառավարական անկարգություններից և ջարդերից հետո Ժողովրդական ներկայացուցիչների համաչինական ժողովը (ՉԺՀ-ի բարձրագույն օրենսդիր մարմինը) որոշեց ինքնուրույն նախաձեռնել Հոնկոնգում ազգային անվտանգության պաշտպանության օրենքի ընդունումը: Այս իրավական ակտը, ինչպես հայտարարում է Պեկինը, ուղղված է ահաբեկչության, անջատողականության, պետական իշխանության խարխլման, օտար ուժերի հետ դավադրության սպառնալիքների դեմ պայքարին և որպես առավելագույն պատիժ նախատեսում է ցմահ ազատազրկումը։ Արդյունքում օրենքը մտցվեց Հոնկոնգի Հիմնական օրենքի հավելվածներից մեկում: