5-6 տարվա ընթացքում կրթությունը Հայաստանում թանկացել է 20-30 տոկոսով։ ԵԱՏՄ անդամների շարքում Հայաստանն ամենաաղքատ երկիրն է։ Այս մասին ապրիլի 17-ին կայացած քննարկման ժամանակ ասել է տնտեսական գիտությունների թեկնածու Սուրեն Պարսյանը։
Նրա գնահատմամբ, Հայաստանում յուրաքանչյուր երրորդ երեխան ապրում է աղքատության մեջ, և առանց կրթություն ստանալու՝ նա, ամենայն հավանականությամբ, նույնպես աղքատ կլինի և չի կարողանա «բարձր բաների» մասին մտածել։
Նա հավելել է, որ առաջին անհրաժեշտության ապրանքների և վառելիքի գների հետ կապված իրավիճակը մտահոգիչ է, այն դեպքում, երբ սննդի և էներգետիկայի ինքնաբավությունը շատ կարևոր է անվտանգության համար։
«Հայաստանը Ռուսաստանից է ներկրում էներգապաշարների 80%-ը և ցորենի 99%-ը։ Եթե մենք ուզում ենք ապրել ապահով երկրում, ուրեմն պետք է լուծել ինքնաբավության խնդիրները։ Եթե մենք ցանկանում ենք դիվերսիֆիկացնել մեր արտաքին քաղաքականությունը, ապա անհրաժեշտ է իրականացնել տնտեսական ծրագրեր և ներդրումներ ներգրավել։ Հայաստանի իշխանությունները պետք է բացատրեն իրենց գործընկերներին թե՛ Մոսկվայում, թե՛ Արևմուտքում, որ եթե հրաժարվեն մեկ ուղղությունից, ապա կկորցնեն շրջանառությունն ու հնարավորությունները այլ ոլորտներում։ Պետք է զարգացնել առևտրային հարաբերությունները ԵՄ-ի հետ, իսկ միայն քաղաքական հայտարարություններով այս հարցը չի կարող լուծվել։ Կոնկրետ ծրագրեր չկան»,- ընդգծել է Պարսյանը։
Նա հայտնել է, որ Հայաստանում «Միր» քարտերի օգտագործման հետ կապված սահմանափակումների պատճառով խնդրի առաջ կկանգնեն մոտ 300 հազար թոշակառուներ և նպաստ ստացողներ։
Փորձագետը կարծում է, որ իշխանությունները պետք է գոնե ժամանակ տային նոր իրականությանը հարմարվելու համար։
Նա հիշեցրել է, որ 2018-ին իշխանափոխությունը տեղի ունեցավ «կոռուպցիա», «մենաշնորհներ», «ակտեր» և «վարկեր» կարգախոսներով։
«Եթե մենք ուզում ենք ազդել իրական քաղաքական գործընթացների վրա, ապա պետք է հասկանանք, որ հասարակ մարդկանց հետաքրքրում են այդ հարցերը։ Պետք է «տեղում» հասկանալ մարդկանց խնդիրները»,- եզրափակել է Պարսյանը։
