ՆԳՆ Ոստիկանները թույլ չեն տալիս կիրանցիներին շարունակել ակցիան։ Այս մասին NEWS.am-ին հայտնում են ակցիայի վայրից։
«Ոստիկանությունը ուզում է վերականգնել այլոց խախտված իրավունքները և բացել ճանապարհը։ Ձեր ձայնը բարձրացրե՞լ եք, լսելի դարձրե՞լ եք, լրագրողները լուսաբանե՞լ են, դրանք ձեր խնդրի բարձրացման եղանակներն են, բայց այլոց իրավունքների հաշվի՞ն։ Չի նշանակում, որ ձեզ իրավունք է վերապահվում մնացած 3 միլիոնի իրավունքները խախտել»,- իր խոսքում նշել է ՆԳՆ ոստիկանության ներկայացուցիչը՝ դիմելով Բագրատ Սրբազանին։
Սրբազանն ընդգծել է, որ ակցիան Ոստիկանության հետ որևէ խնդիր չունի. «Ոստիկանությունը պետք է ապահովի այս մարդկանց անվտանգությունը»։
Նշենք, որ վաղ առավոտից կիրանցիները փակել են Կիրանց-Ոսկեպար ճանապարհը։ Ֆեյսբուքյան եթերի ժամանակ քաղաքագետ Սուրեն Պետրոսյանը հայտնել էր, որ Ոսկեպարի Սուրբ Աստվածածին եկեղեցու մոտ է, որտեղ զինված ուժերը փորձում էին ականազերծման աշխատանքներ իրականացնել եկեղեցու հարակից տարածքներում։ Սակայն գյուղի բնակիչները խոչընդոտել են և թույլ չեն տվել աշխատանքները շարունակել։
