Արցախի հանրապետության նախագահ Բակո Սահակյանը նոյեմբերի 30-ին այցելել է Արգենտինայի հյուսիսում գտնվող Չակո նահանգ եւ ծանոթացել ագրոարդյունաբերական համալիրների աշխատանքի հետ:
ԼՂՀ նախագահի մամուլի գրասենյակից NEWS.am-ին հայտնում են, որ առանձնակի հետաքրքրություն է առաջացրել նահանգի փորձը գյուղատնտեսության ինտենսիվ զարգացման, տոհմային անասնաբուծության, ոռոգման ժամանակակից տեխնոլոգիաների կիրառման եւ գյուղմթերքների վերամշակման ոլորտներում:
Պայմանավորվածություն է ձեռք բերվել վերոհիշյալ ոլորտներում համագործակցության հաստատման շուրջ, ինչը Նախագահ Սահակյանը կարեւոր է համարել մեր հանրապետության գյուղատնտեսության զարգացմանը նոր որակ հաղորդելու տեսանկյունից:
Նախագահին ուղեկցել են Արցախի թեմի առաջնորդ Պարգեւ արքեպիսկոպոս Մարտիրոսյանը, Արցախի Հանրապետության Նախագահի աշխատակազմի տեղեկատվության գլխավոր վարչության պետ Դավիթ Բաբայանը, արգենտինահայ գործարարներ եւ բարերարներ: