Հարավային Ռուսաստանի թեմակալ առաջնորդ Տ.Մովսես եպիսկոպոս Մովսեսյանի եւ Կոտայքի թեմի առաջնորդ Տ. Առաքել եպիսկոպոս Քարամյանի ձեռքով նոյեմբերի 29-ին օծվել է Ստավրոպոլի երկրամասի Գեորգիեւսկ քաղաքի Սբ. Գեւորգ եկեղեցին: Հարավային Ռուսաստանի Հայոց Թեմի, մամլո դիվանից NEWS.am-ին հայտենցին, որ
Սբ. Գեւորգ եկեղեցու հիմնական բարերարներն են՝ Սերգեյ Դոեւը, Իգոր Ավանեսյան,Վալերի Ցուգունյանը, Վլադիմիր Հարությունյանը, ինչպես նաեւ մի շարք հավատացյալ հայորդիներ: Վեհափառ Հայրապետի օրհնությունը ժողովրդին է փոխանցել Կոտայքի թեմի առաջնորդ Տ. Առաքել եպիսկոպոս Քարամյանը, իսկ թեմակալ առաջնորդ Մովսես Սրբազանը ներկայացրել է եկեղեցու կարեւորությունը, եւ իր գնահատանքն ու օրհնությունը բաժանել բոլոր բարերարներին, հավատավոր ժողովրդին եւ հատկապես բարձր գնահատել սբ. Գեւորգ եկեղեցու հովիվ արժանապատիվ Տ. Վարդան քահանա Հունանյանի նվիրական ծառայությունը:
Նշենք, որ Գեորգիեւսկ քաղաքը հիմնվել է 1777թ.: Հիմնադրումից հետո այստեղ տեղափոխվել են հայեր Արեւմտյան Հայաստանի տարբեր բնակավայրերից, մասնավորապես Վանից, Մուշից, Համշենից: 1780-90-ականներին քաղաքում կառուցվել է Սբ. Գեւորգ եկեղեցին, որը Երկրորդ Համաշխարհային պատերազմի տարիներին քանդվել է համայնավարների կողմից (1942թ.): Ներկայումս քաղաքում ապրում է մոտ 15-20 հազար հայություն: