Լեռնային Ղարաբաղի Հանրապետության իշխանությունները կշարունակեն երկրի պաշտպանունակության ամրապնդման հետեւողական աշխատանքները: Այս մասին հաղորդել է Լեռնային Ղարաբաղի Հանրապետության նախագահ Բակո Սահակյանը` դեկտեմբերի 14-ին ելույթ ունենալով «Արցախյան պատերազմի վետերանների միություն» կազմակերպության 5-րդ համագումարում:
Ինչպես տեղեկացնում է ԼՂՀ նախագահի մամուլի ծառայությունը, Բակո Սահակյանը նշել է, որ տնտեսության բոլոր ոլորտները ներդաշնակ զարգացնելու, բնակչության սոցիալական պայմանները բարելավելու աշխատանք է տարվում:
Նրա խոսքով` հանրապետության յուրաքանչյուր քաղաքացու բարեկեցությունը, հասարակության մեջ համախմբվածության եւ առողջ բարոյահոգեբանական մթնոլորտի պահպանումը կախված է նաեւ այդ առաջադրանքների արդյունավետ լուծումից:
«Մենք բազմիցս ասել ենք, բայց ուզում եմ եւս մեկ անգամ կրկնել. Լեռնային Ղարաբաղը հակամարտության խաղաղ կարգավորման կողմնակից է, բանակցությունների սեղանի շուրջ անմիջական երկխոսության ճանապարհով հարթելու կողմնակից:
Բայց դա ամենեւին էլ չի նշանակում, որ մենք անհրաժեշտության դեպքում պատրաստ չենք արժանի հակահարված հասցնել մեր հակառակորդին: Մեր ազատությունն ու անկախությունը վտանգող ցանկացած քայլի համապատասխան հակահարված կհասցվի, նույնիսկ` ավելին»,- ասել է Սահակյանը: