Ղարաբաղյան հակամարտությունը Վրաստանի համար «մարտահրավեր» է: Այդ մասին նշվում է Վրաստանի ազգային անվտանգության նոր հայեցակարգում:
«Հայաստանի եւ Ադրբեջանի միջեւ զինված դիմակայության վերսկսումը կթուլացնի Հարավային Կովկասի բոլոր երեք երկրների անվտանգությունը եւ կնպաստի տարածաշրջանում Ռուսաստանի ազդեցության աճին»,-ասվում է փաստաթղթում:
Հայեցակարգի` «Վրաստանի անվտանգության քաղաքականության հիմնական ուղղությունները» մասը վերաբերում է Հարավային Կովկասի հարեւանների հետ հարաբերություններին: Հայաստանի հետ հարաբերությունները գնահատվում են որպես «սերտ գործընկերային», իսկ Ադրբեջանի հետ`ռազմավարական:
«Վրաստանին Ադրբեջանի եւ Հայաստանի հետ կապում են ավանդական բարիդրացիական հարաբերությունները: Վրաստանը կարծում է, որ տարածաշրջանի հետագա զարգացման վերաբերյալ ընդհանուր մոտեցումների ձեւավորումը հսկայական նշանակություն ունի: Տարծաշրջանային համագործակցության խորացումը, միասնական տնտեսական տարածքի ձեւավորումը եւ ընդհանուր շուկայի զարգացումը նկատելիորեն կաջակցեն տարածաշրջանի կայունությանն ու բարօրությանը»,- նշված է հայեցակարգում:
Վրաստանը Թուրքիային համարում է «առաջատար տարածաշրջանային գործընկեր»:
Հիշեցնենք, որ Վրաստանի խորհրդարանը դեկտեմբերի 23-ին արտահերթ նստաշրջանի ընթացքում հաստատել է երկրի Ազգային անվտանգության հայեցակարգը: Փաստաթղթում գլխավոր սպառնալիքների եւ մարտահրավերների թվում նշվում է Ռուսաստանի կողմից «Վրաստանի տարածքների օկուպացիան», «Ռուսաստանի կողմից նոր ռազմական ագրեսիայի ռիսկը», ինչպես նաեւ «Ռուսաստանի կողմից օկուպացված տարածքներում ահաբեկչական ակտերի կազմակերպումը»: