Ամերիկացի գիտնականները Պլուտոնի մակերեւույթին կյանքի նշաններ են հայտնաբերել, այն է` օրգանական ծագման մոլեկուլներ, որոնք կյանքի համար անհրաժեշտ բաղադրիչներ են:
ՆԱՍԱ-ի «Հաբբլ» տիեզերական հեռադիտակի օգնությամբ գիտնականները գաճաճ մոլորակում Արեգակի ուլտրամանուշակագույն ճառագայթների կլանման բարձր աստիճանով առանձնացող գոտիներ են հայտնաբերել: Այդ յուրահատկությունը ցույց է տալիս օրգանական նյութերի առկայությունը, ամենայն հավանականությամբ` բարդ կառուցվածքով մոլեկուլների, որոնց բաղադրության մեջ ածխաջրածին կամ ազոտ է պարունակվում:
Կոլորադո նահանգի Հարավ-արեւմտյան հետազոտական ինստիտուտի տնօրեն Ալան Սթեռնը հիշեցրել է, որ գաճաճ մոլորակի վրա սառած վիճակում մեթան եւ ածխածնի օքսիդ էր հայտնաբերվել: Նրանց փոխազդեցությունը տիեզերական ճառագայթման հետ էլ հանգեցնում է ուլտրամանուշակագույն ճառագայթներ կլանող նյութերի առաջացմանը, կարծում են գիտնականները:
Հետազոտողները նոր տվյալները համեմատել են 1990-ականներին արված լուսանկարների հետ եւ Պլուտոնի վրա մեծ փոփոխություններ արձանագրել: Սթեռնը եւ իր գործընկերները այդ փոփոխությունները պայմանավորում են «մթնոլորտային ճնշման կտրուկ ավելացմամբ»:
Ամերիկացի գիտնականներն ակնկալում են Պլուտոնի մասին նոր տեղեկություններ ստանալ, երբ նրան կհասնի ՆԱՍԱ-ի «New Horizons» միջմոլորակային զոնդը: Այն 2006թ. հունվարին ուղեւորվել է 6,4 մլրդ կմ տարածությամբ արշավի: Հաջողության դեպքում այն մոլորակին կհասնի 2015թ. հուլիսի 14-ին, տեղեկացնում է ԻՏԱՌ-ՏԱՍՍ-ը: