Անօդաչու թռչող սարքերի Հայաստանի բաց առաջնությունը շատ լավ առիթ է, որ ադրբեջանցիները մրցույթի պայմաններին համապատասխան կառուցեն իրենց թռչող սարքը եւ մասնակցության հայտ ներկայացնեն: Այդ մասին NEWS.am-ին ասաց Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը` մեկնաբանելով ադրբեջանցի ռազմական փորձագետ Ջասուր Սուրեմենլիի այն հայտարարությունը, թե Հայաստանը չի կարող անօդաչու թռչող ինքնաթիռներ ստեղծել` համապատասխան կադրերի բացակայության պատճառով:
Ըստ Կ. Վարդանյանի` նման հայտարարություններ անելուց առաջ պետք է պրոֆեսիոնալ լուրջ գնահատական հնչեցնել: «Դա նույնն է, ինչ ես Երեւանում նստած ասեմ, որ Ադրբեջանում նավթ չկա: Այդ փորձագետի հայտարարությունը ես ավելի շատ դիտարկում եմ որպես ներքին պրոպագանդա: Իրենք իրենց ժողովրդին այնքան են ասել, որ շատ հզոր են, որ Հայաստանում անօդաչու սարքերի մրցույթի մասին տեղեկատվությունը ստիպում է մեկ անգամ եւս կրկնել դա»,-ասաց Կ. Վարդանյանը: Նրա կարծիքով` սա շատ լավ առիթ է, որ հայերն ու ադրբեջանցիները ոչ թե բառերով մրցեն, այլ գործնականում: «Մենք գիտենք, որ ադրբեջանցիները անօդաչու ինքնաթիռների ոլորտում համագործակցում են ԱՄՆ-ի եւ Իսրայելի հետ, այդ տեղեկատվությունը մենք էլ ունեինք: Կարծում եմ` Ադրբեջանում նման մասնագետներ կան. մեր մոտ շատ կան, իրենց մոտ կան: Բայց միայն իրական թռիչքի պայմաններում թող ապացուցեն իրենց ասածը: Դա շատ ավելի ազնիվ ու ռեալ կլինի»,- նշեց Կ. Վարդանյանը;
Նրա տեղեկացմամբ` հայտարարված մրցույթում արդեն գրանցվել են արտասահմանցի մասնակիցներ: Մասնավորապես` Իսպանիայից ու Բելառուսից: Հույս կա, որ մրցույթին կմասնացի նաեւ Մոսկվայի ավիացիոն ինստիտուտի երիտասարդների թիմը: Կ. Վարդանյանը համոզմունք հայտնեց, որ 6-7 հայկական թիմ կհասնեն եզրափակիչ, թեեւ գրանցվածներն ավելի շատ կլինեն: «Կարող են գալ բաց երեսով մեզ հետ մրցել»,- եզրափակեց Կ. Վարդանյանը:
Ավելի վաղ NEWS.am-ը տեղեկացրել էր, որ Հայաստանում 2012 թ., «Արմռոբոտիքսի» շրջանակներում, առաջին անգամ կանցկացվի անօդաչու թռչող սարքերի մրցույթ: