Հայաստանի անկախացումից հետո համամասնական ընտրակարգի անցնելու հարցը մշտապես եղել է քննարկման առարկա: Այս մասին, այսօր` փետրվարի 10-ին, մամուլի ասուլիսում նշեց ԱԺ ՀՀԿ-ական պատգամավոր Գագիկ Մինասյանը խոսելով 100% համամասնական ընտրակարգի անցնելու խնդրի շուրջ:
«ՀՀԿ-ն եղել է այն գաղափարի կողմնակիցը, որ խորհրդարանում համամասնականի տեղերի թիվը պետք է ավելացվի` կամաց-կամաց փոքրացնելով մեծամասնական տեղերի թիվը»,-ասաց նա:
Սակայն, ըստ Գագիկ Մինասյանի, այն հանգրվանը, ուր մենք հիմա հայտնվել ենք, բավականին վճռորոշ հանգրվան է: «Ինչո՞ւ, որովհետեւ երբ մեծամասնական տեղերի քանակը փոքրացնելով հասավ 41-ի, պարզվեց, որ մեր վարչատարածքային միավորումներից ամենափոքրը` Վայոց Ձորի մարզը ներկայացված է ընդամենը մեկ պատգամավորով: Իսկ մեծամասնական տեղերի հետագա քչացումը խորհրդարանում կբերի ընդհանրապես այդ գաղափարի խաթարման: Այսինքն` կլինի վարչատարածքային միավոր, որը չի կարող ունենալ իր պատգամավորը, ինչը քննության խնդիր է»,- նշեց Գագիկ Մինասյանը:
Նա միաժամանակ հարց ուղղեց, թե արդյոք մենք պատրա՞ստ ենք նրան, որ զրկենք մեր ընտրողներին իրենց միջնորդավորված ներկայացվածությունն ունենալ խորհրդարանում` իրենց կողմից ընտրված կոնկրետ պատգամավորի տեսքով:
Ստեղծված վիճակում, որպես այլընտրանք, Մինասյանն նշեց երկպալատանի խորհրդարանի անցումը, որին ինքը` Մինասյանը կողմ չէ: