Մաշտոցի այգում շինարարության դեմ բողոքի ակցիաներ կազմակերպող ակտիվիստներից մեկը` Բայանդուր Պողոսյանը 8-օրյա հացադուլ է հայտարարել: NEWS.am-ի թղթակցի հետ զրույցում նա նշեց, որ միայն ինքն է հացադուլ հայտարարել եւ կոչ չի արել որեւէ մեկին միանալ իրեն, քանի որ հաշվի է առնում իր առողջությունը եւ դիմացկունությունը, մինչդեռ ցանկացած այլ մարդու վրա դա կարող է ուրիշ կերպ անդրադառնալ: Նրա նպատակը մեկն է` այգում կասեցնել շինարարությունը:
Դրանից բացի, հացադուլ հայտարարելով` երիտասարդն ուզում է ցույց տալ, որ իրենք այդքան թույլ չեն, խաղաղ ակցիան կարող է նաեւ այդպիսի դրսեւորում ունենալ: Բայանդուր Պողոսյանի խոսքով` 8 օրից հետո դեպքերի հետագա ընթացքը եւ իր առողջական վիճակը ցույց կտա, թե ինչ է անելու:
Նա նշեց, որ իրեն բոլորն աջակցում են, տաք ծածկոցներ են բերել, կողքի ձյունը մաքրել են: Այսօր հացադուլ հայտարարած ակտիվիստը գիշերելու է այգում:
Բայանդուրը նաեւ տեղեկացրեց, որ այգում այժմ խաղաղ մթնոլորտ է, մարդիկ միանում են իրենց, որեւէ անկարգություն չկա, աջակցողների թիվն ավելանում է:
Նշենք, որ բնապահպան ակտիվիստների ակցիային երեկ միացել են բազմաթիվ հայտնի մարդիկ, որոնք եկել են իրենց բողոքը հայտնելու այգում «բուտիկներ» տեղադրելու դեմ: Մասնավորապես, այգի են ժամանել դերասան Հովհաննես Ազոյանը (Հովո), «Կարգին Սերիալ»-ից` Հայկ Մարությանը (Հայկո), դերասաններ Երվանդ Մանարյանը, Աշոտ Ադամյանը, նաեւ հեռուստահաղորդավարներ Նվեր Մնացականյանը (Հ1), Արթուր Կիրակոսյանը («Երկիր մեդիա»), երգիչներ Արթուր Իսպիրյանը, Արսեն Գրիգորյանը եւ այլք:
Հիշեցնենք, որ այս խնդրով «Մենք ենք այս քաղաքի տերը», «Մեր քաղաքը» նախաձեռնությունները եւ բնապահպանական ակտիվիստները մի քանի օր առաջ հանդիպել են Երեւանի քաղաքապետ Տարոն Մարգարյանի հետ, սակայն ընդհանուր հայտարարի չեն եկել:
