«Մենք ենք այս քաղաքի տերը» քաղաքացիական նախաձեռնությունն արձագանքել է Երեւանի քաղաքապետ Տարոն Մարգարյանի փետրվարի 21-ի հայտարարությանը` կապված Մաշտոցի այգում «բուտիկներ» տեղադրելու հետ:
Նախաձեռնության հայտարարության մեջ ասվում է.
«Արձագանքելով Երեւանի քաղաքապետ Տարոն Մարգարյանի հայտարարությանը` կապված Երեւանի Գլխավոր պողոտայի Մաշտոց-Կողբացի հատվածի կանաչ տարածքի հասարակական հնչեղություն ստացած կառուցապատման հարցի հետ՝ հայտարարում ենք հետեւյալը.
1. Գլխավոր պողոտայի Մաշտոց-Կողբացի հատվածի հանրային այգում տեղի ունեցող շինարարությանն առնչվող բոլոր իրավախախտումների թվարկումը ս.թ. փետրվարի 15-ին բանավոր, իսկ ս.թ. փետրվարի 20-ին գրավոր փոխանցվել է Երեւանի քաղաքապետին: Հարկ ենք համարում նշել, որ հանրային այս զբոսայգին պաշտպանող քաղաքացիներն իրենք են շահագրգռված այդ հարցը լուծել ոչ թե հուզական, այլ առարկայական եւ օրինական դաշտում:
2. Համաձայնելով պարոն Մարգարյանի այն կարծիքին, որ սեփականության իրավունքի պաշտպանությունը կարեւորագույն խնդիր է մեր քաղաքի զարգացման համար՝ ցանկանում ենք շեշտել, որ այդ հարցադրումը վերաբերում է ոչ միայն մասնավոր, այլեւ հանրային սեփականությանը: Ընդ որում, ՀՀ սահմանադրության 31-րդ հոդվածի համաձայն «սեփականության իրավունքի իրականացումը չպետք է վնաս պատճառի շրջակա միջավայրին, խախտի այլ անձանց, հանրության եւ պետության իրավունքներն ու օրինական շահերը»:
3. Չնայած քաղաքապետի պնդմանը, կրկնում եւ հիմնավորում ենք, որ խնդրո առարկա կանաչ տարածքում իրականացվող շինարարությունը չի համապատասխանում «սահմանված կարգով հաստատված եւ համաձայնեցված քաղաքաշինական փաստաթղթերին», խախտում է ՀՀ հողային, քաղաքաշինության եւ շրջակա միջավայրի օրենսդրությամբ սահմանված նորմերը եւ հասարակության կենսագործունեության միջավայրի փոփոխության վերաբերյալ իրազեկվելու եւ որոշումների մասնակցելու իրավունքը` արդյունքում ոտնահարելով Երեւանի քաղաքացիների առողջ եւ բարենպաստ շրջակա միջավայրում ապրելու սահմանադրական իրավունքը:
4. Զբոսայգու «ոչ կանաչապատ, անբարեկարգ եւ անխնամ» վիճակը հետեւանք է Երեւանի քաղաքապետարանի եւ Երեւան համայնքին պատկանող «Կենտրոն-Կանաչապատում» ՓԲԸ-ի անբարեխիղճ գործունեության: Հետաքրքրական է, որ «Կենտրոն-Կանաչապատում» ՓԲԸ-ն զբաղվում է ոչ թե տարածքի կանաչապատման եւ խնամքի աշխատանքներով, այլ կառուցապատմամբ:
5. Գնահատելով հանդերձ Երեւանի քաղաքապետի կողմից «հանրության ներգրավվածության ու իրազեկվածության» կարեւորումը` հիշեցնում ենք, որ այդ գործընթացը կանոնակարգվում է ՀՀ օրենսդրությամբ եւ պետք է տեղի ունենար մինչեւ համապատասխան որոշումների կայացումը:
6. Ձեռնարկատերերի փոխհատուցումը չի կարող գերակայել Երեւանի բնակիչների շահի նկատմամբ, առավել եւս որ տվյալ ձեռնարկատերերը տարիներ շարունակ շահույթ են ստացել հենց հանրային տարածքների հաշվին:
