ԱՄՆ պետքարտուղար Հիլարի Քլինթոնը, պատասխանելով Ամերիկայի Հայ Դատի հանձնախմբի նամակին, ձեռնպահ է մնացել Հայոց ցեղասպանությունը «պատմական քննարկումների հարց» կոչելու սխալից, սակայն նաեւ պատշաճ կերպով չի անվանել ոճրագործությունը, եւ, առավել եւս, չի կատարել Հայոց ցեղասպանությունը պաշտոնապես ճանչելու իր եւ նախագահ Օբամայի խոստումը, գրում է «Asbarez»-ը:
«Թեեւ մենք գնահատում ենք պետքարտուղար Քինթոնի` այս քաղաքական շրջանի ընթացքում ամերիկահայ ընտրողների հետ համագործակցելու պատրաստակամությունը, եւ, իհարկե, ի գիտություն ենք ընդունում այն փաստը, որ նա ձեռնպահ է մնացել իր վերջին` բավականին վիրավորական մեկնաբանություններից, որոնցով կասկածի տակ էր դրվում Հայոց ցեղասպանության փաստը, մենք նախկինի պես մտահգոված ենք նրա սխալ ջանքերով, որոնք ուղղված են ցեղասպանության միջազգային հանցագործությունը նվազեցնելուն` հասցնելով այն երկկողմ հակամարտության մակարդակի»,-ասել է հանձնախմբի նախագահ Քեն Խաչիկյանը: Ըստ նրա` դա թուրքական կառավարության ոչ ճշգրիտ եւ անբարո տարբերակն է, որպեսզի ինչ-որ կերպ հետաձգվի այն օրը, երբ թուրքական պետությունն ու հանրությունն անխուսափելիորեն կբախվեն բարոյական եւ նյութական պատասխանատվությանը` կատարված հանցագործության համար:Ամերիկայի Հայ դատի հանձնախումբը Քլինթոնին նամակ էր ուղղել Հայոց ցեղասպանության վերաբերյալ նրա` հունվարի 26 -ի մեկնաբանությունից հետո, երբ նա այն համարել էր «պատմական քննարկումների հարց»:
Իր պատասխանում Քլինթոնը գրել է, թե «նախագահ Օբաման 2011 թ. ապրիլի 24-ին հարգել է Օսմանյան կայսրությունում սպանված մեկուկես միլիոն հայերի հիշատակը եւ նշել, որ դա քսաներորդ դարի ամենացավալի իրադարձություններց մեկն է: Ես էլ 2010 թ. Հայաստան կատարած այցի ընթացքում այցելել եմ Ծիծեռնակաբերդ»,- հիշեցրել է ԱՄՆ պետքարտուղարը:
Պետքարտուղարն այնուհետեւ, հրաժարվելով Ամերիկայի եւ միջազգային հանրության բարոյական եւ իրավական պատասխանատվությունից, փորձել է ողջ բեռը դնել բացառապես Հայաստանի եւ Թուրքիայի վրա` կոչ անելով նրանց «աշխատել միասին` ընդհանուր պատմության հարցերը լուծելու համար»:Պետքարտուղար Քլինթոնի պատասխանը նույնքան խուսափողական է եղել Ներկայացուցիչների պալատի ենթակոմիտեի նիստում կոնգրեսական Ադամ Շիֆի` «Ունե՞ք խնդիր այն հարցի կապակցությամբ, որ1915 եւ 1923 թվականների միջեւ ընկած ողբերգական շրջանի փաստերը ցեղասպանություն են: Ձեր դիրքորոշումը տարբերվո՞ւմ է սենատոր եղած ժամանակ ունեցած Ձեր տեսակետից» հարցադրմանը:Ի պատասխան Քլինթոնը դիմել է էվֆեմիզմի` օգտագործելով «ահավոր իրադարձություններ», «20-րդ դարի ամենասարսափելի ոճրագործություններից մեկը» արտահայտությունները` ավելի շատ հեռանալով որպես սենատոր 2008 թ-ին արված իր հայտարարությունից, թե «Հայերի նկատմամբ Օսմանյան կայսրությունում ահավոր իրադարձությունները ցեղասպանության վառ օրինակ են»:
