Մարտի 14-ին լրանում է օրիգամիի մեծ վարպետի` Ակիրա Յոսիձավայի ծննդյան 101 եւ մահվան 7-րդ տարին. նա մահացել է իր ծննդյան 94-րդ տարեդարձի օրը:
Թուղթը ծալելու միջոցով պատկերներ ստանալու ճապոնական հնագույն արվեստը 20-րդ դարում Յոսիձավայի շնորհիվ տարածվեց ամբողջ աշխարհում: Վարպետը պայմանական նշանակումներ հորինեց թուղթ ծալելու սխեմաների համար, եւ աշխարհում սկսեցին նրա գծագրերի միջոցով սովորել այդ արվեստը:
Google որոնողական համակարգը ստեղծել է տոնական հերթական տարբերանշանը. այն բաղկացած է օրիգամայի տեխնիկայով ստեղծված տառերից:
Իր ստեղծագործական գործունեության սկզբում Յոսիձավան մեքենաշինական գործարանում աշխատել է որպես գծագրող, եւ նորեկներին սովորեցրել է գծագրական երկրաչափություն` բացատրելու համար օրիգամիի ֆիգուրներ ծալելով:
Երկրորդ համաշխարհային պատերազմի տարիներին Յոսիձավան սկսել է աշխատել Հոնկոնգի զինվորական հոսպիտալի սանիտարական բաժանմունքում, որտեղ վիրավորների մահճակալները զարդարում էր վառ, գույնզգույն թղթե պատկերներով:
1951 թվականին Յոսիձավան հնարավորություն է ստացել իր արվեստը դրսեւորելու: «Ասահի գրաֆ» ամսագիրը որոշել է նկարազարդել իր հոդվածներից մեկը չինական կենդանակերպի նշանների թղթե պատկերներով: Յոսիձավան այնքան հմտորեն է կատարել աշխատանքը, որ «Ասահի գրաֆի» համարը 1952 թվականի հունվարին մեծ հաջողություն է ունեցել, իսկ պատկերների հեղինակը շատ արագ հայտնի է դարձել ինչպես Ճապոնիայում, այնպես էլ նրա սահմաններից դուրս:
1954 թվականին Ճապոնիայում թողարկվել է նրա առաջին` «Օրիգամիի նոր արվեստը» գիրքը, եւ հենց այդ նույն տարին էլ հիմնադրել է Տոկիոյում Օրիգամիի միջազգային կենտրոնը: Յոսիձավան մշակել է օրիգամիի այբուբեն եւ ստեղծել ավելի քան 50 000 օրինակներ: Նա գրել է 18 գիրք եւ հայտնաբերել թաց ծալման տեխնոլոգիան, որի միջոցով կարելի է գեղեցիկ կլոր պատկերները ծալել հաստ թղթից: 1983 թվականին Ճապոնիայի կայսր Հիրոհիտոն նրան պարգեւատրել է ծագող արեւի շքանշանով, որը Ճապոնիայում ամենապատվավոր պարգեւներից է:
Յոսիձավան մահացել է 2005 թվականի մարտի 14-ին` իր ծննդյան 94-րդ տարեդարձի օրը: