Հայաստանի ոստիկանությունը նոր չվերթ է «բացել»` դեպի Շվեդիա: Բանն այն է, որ ոստիկանության պաշտոնական կայքում տեղադրված մամուլի հաղորդագրությունում նշվում է, որ մարտի 20-ին, ժամը 21.20-ին, ոստիկանության ծառայողները «Զվարթնոց» օդանավակայանից բերման են ենթարկել 29-ամյա Հայկ Սիմոնյանին. երիտասարդը Երեւան է ժամանել Երեւան-Շվեդիա չվերթի ինքնաթիռի ժամանումից հետո:
Հաշվի առնելով կոնկրետ չվերթի (Երեւան-Շվեդիա) ձեւակերպման անհստակությունը, NEWS.am-ի թղթակիցը դիմեց գերատեսչության մամուլի ծառայություն: Այնտեղ ճշտումներ կատարելու անհրաժեշտությունն ընդունեցին, սակայն հեռախոսազանգից հետո ժամեր անց տեղեկատվությունը շարունակում էր նախնական տեսքով մնալ կայքում:
Հստակեցնելու համար, թե այնուամենայնիվ որտեղից էր ժամանել երիտասարդ իրավախախտը, ուսումնասիրեցինք Երեւանի «Զվարթնոց» օդանավակայանի կայքէջում տեղակայված չվերթների ցուցակները: Ինչպես պարզվեց, Երեւանից Սթոքհոլմ (եթե Շվեդիա ասելով նկատի ունեին նրա մայրաքաղաքը) եւ հակառակ ուղղությամբ չվերթ բնության մեջ գոյություն չունի:
Ոստիկանության հաղորդագրության մեջ նշված մոտակա հնարավոր փոխադրող չվերթը մեկնել է մոսկովյան Շերեմետեւո օդանավակայանից: Դե ինչ, Շերեմետեւո, թե Շվեդիա, վերջիվերջո, տարբերությունը «մեծ չէ»:
Նշենք, որ Շվեդիայի տարածքում կան շուրջ երկու տասնյակ օդանավակայաններ:
