Հետխորհրդային տարածքում իսրայելցիների համար ամենավտանգավոր վայրերը Ադրբեջանն ու Չեչնիայի Հանրապետությունն են:
Վերջին դեպքում խոսքը շատ մեծ, որոշակի վտանգի մասին է: Այս մասին զգուշացնում է Իսրայելի ահաբեկչության դեմ պայքարի գրասենյակը:
Ազգային անվտանգության խորհրդի ենթակայությամբ գործող ահաբեկչության դեմ պայքարի գրասենյակը Իսրայելի քաղաքացիներին զգուշացրել է արտասահմանում ահաբեկչությունների հնարավորության մասին: Նախազգուշացման համաձայն` գարնանային տոների ընթացքում, որոնք կսկսվեն ապրիլի 6-ից, արտասահմանում գտնվող իսրայելցիների, ինչպես նաեւ սփյուռքի հրեաների նկատմամբ ահաբեկչական հարձակումների հավանականությունը մեծանում է:
Այդ ուղղությամբ հատկապես մեծ ջանքեր են գործադրում Իրանը եւ լիբանանյան ահաբեկչական «Հըզբոլլահ» խմբավորումը: Առաջնահերթ թիրախներ են իսրայելյան գործարարները եւ պետական բարձրաստիճան նախկին պաշտոնյաները: Առավել հավանական են մահափորձերը եւ պատանդ վերցնելու փորձերը:
Հետխորհրդային տարածքում ամենավտանգավոր վայրերի ցուցակում են Ադրբեջանն ու Չեչնիայի Հանրապետությունը: Առաջինի դեպքում նշվում է, որ խոսքը «շարունակական պոտենցիալ վտանգի» մասին է, եւ իսրայելցիներին խորհուրդ է տրվում չայցելել այդ երկիր առանց ծայրահեղ անհրաժեշտության: Չեչնիայի պարագայում նշվում է, որ խոսքը «շատ մեծ, որոշակի վտանգի մասին է» եւ խորհուրդ է տրվում «խուսափել այնտեղ ցանկացած այցից», հաղորդում է IzRus-ը:
