«Հայկական ժամանակ» թերթը գրում է. «Այս տարվա առաջին կիսամյակը, ըստ պաշտոնական վիճակագրության, եղել է տնտեսական զարգացման եւ բարգավաճման ժամանակահատված։ Երկար տարիների ընդմիջումից հետո աճ է արձանագրվել անգամ շինարարության ոլորտում՝ 0.6 տոկոս։
Ինչպես է ստացվել այդ աճը։ ՀՀ ազգային վիճակագրական ծառայության պաշտոնական տեղեկանքի համաձայն՝ Կոտայքի մարզում բնակչության միջոցների հաշվին նշված ժամանակահատվածում ավելի շատ շինարարություն է կատարվել, քան Երեւանում։
Ըստ այդ տեղեկանքի՝ Կոտայքում բնակչությունն իրականացրել է մոտ 25 հազար քմ բնակելի շենքերի շինարարություն, իսկ Երեւանում՝ ընդամենը 17 հազար քմ։ Ուշագրավն այն է, որ Կոտայքի մարզի բնակչությունը մոտ 4 անգամ քիչ է, քան Երեւանինը։
Նշենք, որ միայն Կոտայքի մարզում այս «ցատկի» շնորհիվ է հնարավոր դարձել շինարարության ոլորտում «աճ» արձանագրել։ Այսպիսի վիճակագրական «ցատկեր» արձանագրվել է նաեւ այլ ոլորտներում։
Հիշեցնենք, որ ՀՀ վարչապետ Հովիկ Աբրահամյանը վերջերս հայտարարել էր, որ այս տարի Հայաստանում գրանցվելու է ավելի քան 4 տոկոս աճ: Սա ըստ էության մեր վիճակագիրներին իջեցված հանձնարարությունն է, որը վերջիններս հաջողությամբ կատարում են»:
Առավել մանրամասն՝ թերթի այսօրվա համարում