«Ժառանգություն» կուսակցության առաջնորդ Րաֆֆի Հովհաննիսյանը կառաջադրվի Հայաստանի 2013թ. նախագահական ընտրություններին, եթե մինչ այդ երիտասարդ սերունդն իր այլընտրանքային թեկնածուին չառաջադրի: Այդ մասին «100 հարցեր եւ պատասխաններ» քննարկումների ձեւաչափում, այսօր` ապրիլի 10-ին, հայտարարել է ինքը` «Ժառանգություն» կուսակցության առաջնորդ Րաֆֆի Հովհաննիսյանը, պատասխանելով այն դիտարկմանը, թե մեկ տարի առաջ ինքը նշել էր, որ մտադիր չէ առաջադրվել երկրի ղեկավարի պաշտոնում:
Հովհաննիսյանի ներկայացմամբ` իր խոսքը ենթատեքստից կտրված է ներկայացվել, եւ այն լիարժեք մեջբերում չէր:
Հովհաննիսյանը նշել է, որ միշտ կողմնակից է նոր այլընտրանքային թեկնածուների հայտնվելուն. «Ես կողմ եմ, որ նոր սերունդը ներկայացնի այլընտրանքային թեկնածուի, որին ես կաջակցեմ իմ փորձով: Սակայն եթե այլընտրանք չլինի, ապա ես այն կդառնամ անհրաժեշտության դեպքում` իմ թեկնածությունը դնելով սպասվող նախագահական ընտրություններին»:
Նշենք, որ մայիսի 6-ին կայանալիք խորհրդարանական ընտրություններին «Ժառանգությունը» մասնակցում է «Ազատ դեմոկրատներ» կուսակցության հետ միասնական ցուցակով, որտեղ ներգրավված են նաեւ քաղաքացիական հասարակության ներկայացուցիչներ:
