«West Publishing» ընկերության նախկին ղեկավար Ջերալդ Գաֆեսճյանը նախկին աշխատակցին մեղադրել է ընկերությունից եւ իրենից միլիոնվոր դոլարներ հափշտակելու մեջ, հաղորդում է «Star Tribune»-ը:
86-ամյա Ջերալդ Գաֆեսճյանը, որը ներկայումս բնակվում է Ֆլորիդայի նահանգի Նեյպլսե քաղաքում, հայց է ներկայացրել Սենտ Պոլում: Սա պատասխան հայց է անցած ամիս նախկին աշխատակից 55-ամյա Ջոն Ջոզեֆ Ութերսոմ կրտսերի ներկայացրած հայցի:
Վերջինս իր հայցի մեջ նշում էր, որ ծերանալու հետ Գաֆեսճյանն ավելի գծուծ եւ քինախնդիր է դարձել եւ իրեն զրկել է առնվազն 5 մլն դոլարի աշխատավարձից:
Գաֆեսճյանն էլ հակընդդեմ հայց է ներկայացրել` նշելով, որ Ուոթերսը չարաշահել է վստահությունը` հինգ տարվա ընթացքում մոտ երեք մլն դոլար հափշտակելով: Գաֆեսճյանը նաեւ պնդում է, որ Ուոթերսը, հնարավոր է, մասնակցել է հարկային խաբեության, փողերի լվացման եւ ապօրինի բանկային գործարքների` ենթադրյալ գողությունը թաքցնելու համար: ՀԴԲ-ն քննում է այդ մեղադրանքները: