Վրաստանում ՀՀ դեսպանության, Հայ առաքելական եկեղեցու Վիրահայոց թեմի, Վրաստանի գրողների միության, Թբիլիսիի հայերի միության, քաղաքային խորհրդարանի (Սաքրեբուլո) ներկայացուցիչների եւ համայնքային ճանաչված գործիչների մասնակցությամբ, ապրիլի 11-ին, տեղի է ունեցել հայ ռեալիստական դրամատուրգիայի, ազգային արեւելաեվրոպական թատրոնի հիմնադիր Գաբրիել Սունդուկյանի հուշատախտակի վերաբացման արարողությունը` Թբիլիսիի Մաչաբելի-9 հասցեում: Այստեղ է 1825-1912 թթ. ապրել եւ վախճանվել է հայ մեծանուն դրամատուրգը:
Հուշատախտակի բացման առթիվ ելույթ է ունեցել Վրաստանում ՀՀ դեսպան Հովհաննես Մանուկյանը, ով իր խոսքում, մասնավորապես, նշել է. «Գաբրիել Սունդուկյանն իր ամբողջ ստեղծագործական եւ հասարակական գործունեությամբ ծառայել է հայ եւ վրաց ժողովուրդների բարեկամությանը: Ուստի բնականոն է, որ հայ մեծ դրամատուրգին նվիրված հուշատախտակն այսօրվանից տեղ է գտնելու նրա սիրած քաղաքում` Թբիլիսիում, ի նշանավորումն նրա ստեղծագործության ու անբասիր կյանքի նկատմամբ խորին հարգանքի եւ երախտագիտության: Հայ ժողովուրդը երբեք չի մոռանա իր մեծանուն գործչին, սակայն մեզ համար հատկապես հաճելի է, որ նրան հիշում են նաեւ Վրաստանում, ինչի վառ վկայությունն այսօրվա միջոցառումն է»:
Գաբրիել Սունդուկյանի հուշատախտակի բացման արարողությանը հանդես են եկել նաեւ Վրաստանի գրողների միության նախագահ տիկին Մակղվալա Գոնաշվիլին, ինչպես նաեւ Թբիլիսիի քաղաքային խորհրդարանի (Սաքրեբուլո) ներկայացուցիչը: