Ամերիկյան Վերմոնտ նահանգի նահանգապետ Փիթեր Շամլինը անզեն վիճակով փորձել է քշել թռչունների կերամաններին մոտեցած 4 արջերին: Ամերիկյան լրատվամիջոցների փոխանցմամբ` նահանգապետը արջերից թաքնվել է իր տանը: Ասում են, նրա բախտը բերել է, քանի որ ձմեռային քնից արթնացած արջերը քաղցած շրջում են տարածքում:
Ինչպես հաղորդել է նահանգապետի մամոիլի ծառայությունը, Շամլինը կեսգիշերին աղմուկ է լսել եւ պատուհանից նայելով տեսել է 4 արջերի, որոնք փորձում էին վայելել թռչունների համար պատշգամբից կախված կերամանների պարունակությունը, գրում է NEWSru.com-ը:
Անգամ կոշիկ չհագնելով` Շամլինը վազել է բակ` փորձելով քշել չորքոտանի գողերին: Գազաններից մեկը գնացել է դեպի նահանգապետը` վերջինիս ստիպելով փախուստի դիմել: Շամլինին հաջողվել է մտնել տուն եւ դուռը փակել:
«Վերմոնտը քիչ է մնում զրկվեր նահանգապետից: Նրան հազիվ է հաջողվել փախչել «ավազակների» ճանկից: Բայց հուսով եմ, նրա համար դաս եղավ, որ մյուս անգամ վաղ գարնանը կերամաններ չկախի պատշգամբից», -նշել է նահանգապետի մամուլի քարտուղարը:
