«Ձախ ճակատի» համակարգող Սերգեյ Ուդալցովի կինը` Անաստասյան, իր թվիթերում հրապարակել է հատվածական տեսահոլովակ, որն, ըստ նրա, ապացուցում է, որ Ուդալցովի կողմից լրագրողուհու ծեծն իշխանությունների սադրանքն է:
Ըստ ռուսական լրատվամիջոցների հաղորդման` նա առաջարկում է ծանոթանալ տեսագրությանը, որն ավելի վաղ ներկայացվել էր իբր տուժած Պոզդնյակովայի կողմից` որպես Ուդալցովի իր վրա հարձակման ապացույց: «Նայեք քայլ առ քայլ կարգով: Դուք կհամոզվեք, որ դա մոնտաժ է եւ իշխանությունների, ոստիկանության հորինվածք կոնկրետ մարդու դեմ, որից իսկապես վախենում են եւ տարբեր պատճառներով ցանկանում հեռացնել հասարակությունից», - ասվում է տեսագրության մեկնաբանություններում:
Ինչպես ավելի վաղ հայտնել էր NEWS.am-ը, ապրիլի 21-ին Ուլյանովսկում ձերբակալել էին ռուս ընդդիմադիր, «Ձախ ճակատի» համակարգող Սերգեյ Ուդալցովին: Նրան մեղադրում են «Դորոժնոյե ռադիո»-ի լրագրող Աննա Պոզդնյակովային ծեծելու մեջ:
«Եդինայա Ռոսիա» կուսակցության Պետդումայի պատգամավոր Վլադիմիր Բուրմատովը պատմել է, որ լրագրողուհին հարցեր էր տալիս Ուդալցովին Ուլյանովսկի հանրահավաքի ժամանակ: Շեինի հացադուլի մասին հարցից հետո ընդդիմադիրը հարձակվել է նրա վրա եւ սկսել ծեծել: «Հավանաբար երիտասարդ հեղափոխականի նյարդերը տեղի են տվել», – կարծում է կուսակցականը:
Ուդալցովն ինքը այդ ամենն անվանել է սադրանք. «Ուլյանովսկում հանրահավաքի ավարտից հետո ինձ բռնեցին ոստիկանության աշխատակիցները: Իբրեւ թե Ուլյանովսկի ՆԳՆ հաղորդում էր ստացվել մի կնոջից, որ ես նրան մարմնական վնասվածքներ եմ հասցրել: Ես դա սադրանքից բացի այլ բան չեմ կարող որակել»:
Ուդալցովի շատ համակիրներ «ծեծելու» հետ կապված այդ միջադեպը գնահատում են որպես մայիսի 6-ին նախատեսված «միլիոնների երթի» նախաշեմին Ուդալցովին մեկուսացնելու իշխանությունների ձգտում:
