Թուրք երգահան եւ դաշնակահար Ֆազիլ Սայը հայտարարել է, որ Թուրքիայում պահպանողական իսլամի աճն իրեն ստիպում է երկրից հեռանալ եւ բնակություն հաստատել Ճապոնիայում: Երբ երաժիշտը հրապարակայնորեն հայտարարել է աթեիստ լինելու մասին, նրա նկատմամբ հայրենիքում հալածանքներ են սկսվել:
Hürriyet թերթի հետ հարցազրույցում Ֆազիլ Սայն ասել է, որ ալլահին չհավատալու իր հեգնական հակաիսլամական մեկնաբանությունների եւ հայտարարությունների կտրուկ արձագանքը երեւան է հանել թուրքական հասարակության հոգեւոր անհանդուրժողականությունը: Մասնավորապես, իշխող «Արդարություն եւ զարգացում» կուսակցության պատգամավոր Շամիլ Թայարը երգահանին անվանել է «անառակի որդի»: «Երբ ասացի, որ ես աթեիստ եմ, բոլորն սկսեցին ինձ վիրավորել, իսկ թվիթերում իմ հաղորդագրությունները հետաքրքրություն առաջացրին իրավապահ մարմինների մոտ, - պատմել է Սայը: -
Հավանաբար, ես աշխարհում առաջին մարդն եմ, որը ենթարկվում է դատական հետապնդման աթեիզմի համար»:
Ըստ թուրքական օրենքների` հոգեւոր արժեքներն անարգելու համար դատապարտվում են երեք ամսից մինչեւ մեկ տարվա ազատազրկման: «Եթե ես հայտնվեմ բանտում, իմ կարիերան կխորտակվի, - ասում է երաժիշտը: - Կարծում եմ` ժամանակն է Ճապոնիա տեղափոխվելու»:
