Ստամբուլի Թաքսիմի հրապարակում ապրիլի 24-ի երեկոյան` 19:15-ին սկսվել է Հայոց ցեղասպանության զոհերի հիշատակման միջոցառում, որը կազմակերպել էր թուրքական «Ոչ ասենք ռասիզմին եւ ազգայնականությանը» շարժման կողմից:
Թուրքական Haberler-ի փոխանցմամբ` 1915-ի զոհերի հիշատկման միջոցառմանը մասնակցել են Հրանտ Դինքի այրին` Ռաքել Դինքը, «Խաղաղություն եւ ժողովրդավարություն» կուսակցության պատգամավորներ Սըրրը Սուրեյա Օնդերը, Սեբահաթ Թունջելը, լրագրող Օրալ Չալըշարը, Ուֆուք Ուրասը, պրոֆեսոր Բասքըն Օրանը, նախորդ տարի ապրիլի 24-ին զորամասում ծառայակցի կողմից սպանված Սեւակ Շահին Բալըքչըի ընտանիքի անդամները եւ այլք:
«Ոչ ասենք ռասիզմին եւ ազգայնականությանը» շարժման անունից հայտարարությամբ է հանդես եկել շարժման անդամ Զիշան Թոքաչը` դատապարտելով 1915-ի ապրիլի 24-ով սկսված Հայոց ցեղասպանությունը:
Նախկին պատգամավոր Ուֆուք Ուրասն իր ելույթում նշել է, թե մինչեւ Թուրքիան չառերեսվի Իթթիհադականների արածների հետ, Թուրքիայում ժողովրդավարություն չի հաստատվի:
2010-ից Ստամբուլի Թաքսիմի հրապարակում 1915-ի զոհերի հիշատակին նվիրված միջոցառումներին այս տարի առաջին անգամ կոչով հանդես են եկել Ստամբուլի հայկական համայնքի ներկայացուցիչներ` խորհրդանիշ ընտրելով կտրված նուռը, որը ցույց է տալիս, որ վերքերը դեռ բաց են եւ արյունահոսում են: Կտրված նռան վրա գրված է եղել. «Որոշ վերքեր ժամանակը չի բուժում, ապրիլի 24, 1915»:
Հայոց ցեղասպանության զոհերի հիշատակի միջոցառման անցկացման դեմ Թասքիմի հրապարակի մյուս մասում հավաքվել են ազգայնականների մի քանի խմբեր, ովքեր հայտարարությամբ հանդես գալուց հետո ցրվել են:
Ոստիկանությունը Թաքսիմի հրապարակում անվտանգության խիստ միջոցառումներ է ձեռնարկել` պատնեշ կազմելով Հայոց ցեղասպանության զոհերի հիշատակման միջոցառման մասնակիցների եւ թուրք ազգայնականների միջեւ:
Աչքի է ընկել այն հանգամանքը, որ այս տարի Թաքսիմի հրապարակում Հայոց ցեղասպանության զոհերի հիշատակի միջոցառմանը նախորդ տարիների համեմատ ավելի շատ մարդ է մասնակցել: Մասնակիցների թիվն անցել է 500-ը:
Միջոցառման տեսագրությունը դիտելու համար սեղմեք
