Ֆրանսիայի նախագահ Նիկոլա Սարկոզին մտադիր չէ համաձայնագրեր կնքել ուլտրաաջերի «Ազգային ճակատ» կուսակցության հետ, թեեւ երկրում նախագահական ընտրությունների առաջին փուլից հետո իր հենց առաջին ելույթում նա մի շարք հայտարարություններ էր արել` ուղղված Մարին Լե Պենի գլխավորած կուսակցության ընտրազանգվածին:
«Ազգային ճակատի» հետ համաձայնագիր չի լինի»,- France info ռադիոկայանի եթերում հայտարարել է Սարկոզին:
Բացի այդ, Ֆրանսիայի նախագահը չի պատրաստվում իր հաղթանակի դեպքում կառավարությունում տեղեր հատկացնել «Ազգային ճակատին»:
«Մենք նախարարներ չենք ունենա «Ազգային ճակատ»-ից, սակայն ես ճիշտ չեմ համարում ընտրողներին սեւացնելու փորձերը, ովքեր առաջին փուլում քվեարկել են այդ կուսակցության թեկնածու Մարին լե Պենի օգտին, ով հավաքել էր ընտրողների 17,9 տոկոսի ձայները»,- հայտարարել է Սարկոզին, հաղորդում է «Ռոսբալտը»:
Հիշեցնենք, որ Սարկոզիի արված հայտարարությունները վերլուծաբաններն ընկալել էին որպես ուլտրաաջերին իր կողմը գրավելու փորձ: Նշվում է, որ Օլանդը երկրորդ փուլում կարող է ստանալ աջ ուժերի օգտիվ քվեարկած ընտրողների ավելի քան 43 տոկոսի ձայները, այն դեպքում, երբ Սարկոզին ստիպված է հույսը դնել «Ազգային ճակատի» օգտին քվեարկած ընտրողների ձայների վրա:
Ինքը` Մարին Լե Պենը հրաժարվել է աջակցել Սարկոզիին, որին «այլեւս չի հավատում»:
Ավելի ուշ սոցիալիստ թեկնածու Ֆրանսու Օլանդը հայտարարել է, որ հույս ունի իր կողմը գրավել նաեւ «Ազգային ճակատի» ընտրազանգվածին: Նա վստահ է, որ ուլտրաաջերի թեկնածու Մարին Լե Պենի օգտիվ քվեարկած ֆրանսիացիները դրանով իրենց սոցիալական բողոքն են հայտնել գործող իշխանությունների քաղաքականությանը:
Հիշեցնենք, որ ապրիլի 22-ին կայացած ընտրություններում Սարկոզին ստացել էր ընտրողների 27,18, իսկ նրա մրցակից Օլանդը` 28,63 տոկոսի քվեն: «Ազգային ճակատ»-ի առաջնորդ Մարին Լե Պենն ստացել է 17,9 տոկոս ձայն, ինչը ռեկորդային է աջ ուղղվածության ուժի համար:
Մարին Լե Պենը հրաժարվել է աջակցել Սարկոզիին: «Ես այլեւս չեմ հավատում Սարկոզիի անկեղծությանը»,-հայտարարել է նա, կոչ անելով իր կողմնակիցներին նույնպես չհավատալ գործող նախագահի հայտարարություններին: