Ուկրաինայի նախկին վարչապետ Յուլիա Տիմոշենկոն, ով նախորդ շաբաթվա վերջին Խարկովի հիվանդանոց բռնի տեղափոխվելուց հետո հացադուլ էր հայտարարել, փաստաբանին հայտնել է բուժհաստատություն տեղափոխելիս իրեն ծեծի ենթարկած մարդու անունը. նա Կաչանովի գաղութի պետի տեղակալ Նիկոլայ Կովալենկոն է:
Տիմոշենկոյի փաստաբան Սերգեյ Վլասենկոն պատմել է, որ նրա խուց է մտել գաղութի պետի առաջին տեղակալ մայոր Նիկոլայ Կովալենկոն` երկու մարդու ուղեկցությամբ եւ հրամայել. «Պատրաստվիր, գնում ենք»: Նա պատասխանել է. «Մենք ամեն ինչ քննարկել եւ որոշել ենք»: Կովալենկոն ասել է. «Կամ քո կամքով կգաս, կամ ուժով կտանենք»:
«Դրանից հետո նրան փաթաթել են ծածկոցով եւ սկսել ծեծել: Տիմոշենկոն շատ բարձր ճչացել է: Յուլիա Վլադիմիրովնան ինձ ասել է, որ իրեն ծեծողը գաղութի պետի առաջին տեղակալ Կովալենկոն էր: Ծեծել են բռունցքներով, նրա որովայնին տղամարդու բռունցքի չափով հեմատոմա կա», - ուկրաինական լրատվամիջոցների փոխանցմամբ` ասել է պաշտպանը:
Ուկրաինայի օմբուդսմեն Նինա Կարպաչեւան հաստատել է Տիմոշենկոյի մարմնական վնասվածքների առկայությունը` չորեքշաբթի օրվա մամլո ասուլիսում հաղորդել է «Փոփոխությունների ճակատ» կուսակցության ղեկավար Արսենի Յացենյուկը: Նա հրապարակել է Կարպաչեւայի հայտարարությունը, որում ասվում է այն մասին, որ իր ներկայացուցիչ Խուդրուկը առանց նախազգուշացման գնացել է Տիմոշենկոյի մոտ, որը նրան ցույց է տվել կապտուկներն ու հեմատոմաները: