Ֆրանսիացի կոմպոզիտոր Միշել Լեգրանը եւ սըր Փոլ ՄըքՔարթնին առաջադրվել են միջազգային բալետային Benois de la danse մրցանակի 2011 թվականին բալետի համար երաժշտություն գրելու համար: Նշվում է, որ երկու երգահաններն էլ առաջին փորձերն են կատարել այդ ժանրում:
«Լավագույն պարուսույց» անվանակարգում հաղթանակի է հավակնում ԱՄՆ-ից Լար Լյուբովիչը եւ ռուս Բորիս Էյֆմանը, Պատրիկ դե Բանան (Հունգարական պետական բալետ), Ժան Գիյոմ Բարը (Փարիզյան ազգային օպերա) եւ կորեացիներ Չոն Ըյ Սուկը եւ Դանիել Պյոնը («Արզիդ» ժամանակակից պարի ընկերություն):
Բալետի պարուհիների շարքում մրցանակի են հավակնում 7 արտիստուհիներ: Միակ ռուս մասնակիցը Եվգենիա Օբրազցովան է, որը նախկինում եղել է Մարինյան թատրոնի, իսկ այժմ` Մեծ թատրոնի մենակատարուհի: 6 հավակնորդներ են առաջադրվել «լավագույն պարողի» համար: Այստեղ մրցակիցներ են. Մեթյու Հոլդինգը (Նիդեռլանդների ազգային բալետ), Չեյզ Ֆինլին (Նյու Յորք սիթիի բալետ), Մաթիաս Էյմանը (Փարիզյան ազգային օպերա), Քարսթեն Յունգը (Համբուրգյան բալետ),Լի Դոն Հունը (Կորեական ազգային բալետ):
Հաղթողների պարգեւատրումը տեղի կունենա մայիսի 22-ին` Մեծ թատրոնի պատմական բեմում: Այս տարի արարողությունը տեղի է ունենալու 20-րդ անգամ, հայտնում է «gazeta.ru»-ն: Benois de la danse մրցանակը հիմնադրվել է 1991 թվականին Պարուսույցների միջազգային գործիչների միության կողմից` Յուրի Գրիգորեւիչի գլխավորությամբ: Այդ ժամանակվանից նա ժյուրիի անփոխարինելի նախագահն է:
Մրցանակի անվանումը ֆրանսերենից թարգմանաբար նշանակում է «Բալետային Բենուա», սակայն ստեղծագործական շրջաններում այն վաղուց կնքել են որպես «Բալետային Օսկար»:
