Իսպանիայի հյուսիսում փոթորիկը քիչ է մնացել ավիավթարի հանգեցնի: Բիլբաոյի օդանավակայանում ինքնաթիռի վայրէջքի համար անձնակազմն առավելագույն ջանքեր է գործադրել:
103 կմ/ժ արագությամբ ուժեղ քամին ապրիլի 26-ին պատուհասել էր բասկերի երկրին եւ Նավարային: Որոշ բնակավայրերում գրանցվել է քամու մինչեւ 130-140 կմ/ժ արագություն:
Օդանավակայանի թռիչքուղին պատկերող տեսագրությունում երեւում է, թե ինչպես մոտ 10 ուղեւորատար ինքնաթիռներ բացահայտ դժվարություններ են կրում վայրէջք կատարելիս: Ավելի խոշոր օդանավերն ուղեւորների համար անմոռանալի մի քանի պահերից հետո ամեն դեպքում վայրէջք են կատարել եւ այնուհետեւ սահել թռիչքուղով` դանդաղեցնելով արագությունը:
Ավելի փոքր ինքնաթիռների վիճակն ավելի վատ է եղել. քամին դրանք օդ է նետել թղթե ինքնաթիռների նման, հայտնում է NEWSru.com-ը:
Ինչպես նշում են տեղական լրատվամիջոցները, երեկվա անբարենպաստ եղանակը լուրջ հետեւանքներ չի ունեցել: Մի շարք բնակավայրերում էլեկտրամատակարարման խափանումներ են առաջացել: Նավահանգիստներում փոթորկի նախազգուշացում է արվել: Նավերին արգելվել է ծով դուրս գալ. քամին ալիքները բարձրացրել է մինչեւ 3 մ: