Ուկրաինայի նախկին վարչապետ Յուլյա Տիմոշենկոն մտավախություն ունի, որ ուկրաինացի բժիշկները ներարկումների միջոցով դիտավորյալ իրեն կվարակեն հեպատիտով: Այս մասին ավելի վաղ նա հայտնել էր իրեն զննող գերմանացի բժիշկներին, հաղորդում է Bild տաբլոիդը:
Որպես օրինակ պարբերականը բերում է Ուկրաինայի ՆԳ նախկին նախարար Յուրի Լուցենկոյին, ով եւս գտնվում է բանտում:
Լուցենկոյի կինը` Իրինան պնդում է, որ ամուսնու մոտ հեպատիտ է հայտնաբերվել, որով նա վարակվել է ազատազրկման վայրում ներարկում անելու հետեւանքով: Ուկրաինայի քրեակատարողական ծառայությունը, սակայն, հայտարարել է, որ Լուցենկոյի մոտ հեպատիտ հայտնաբերված չէ, հաղորդում է «ՌԻԱ նովոստին»:
Պարբերականի տրամադրության տակ հայտնված բժիշկների եզրակացության մեջ ասվում է, որ բանտում Տիմոշենկոյին ցավազրկող ներարկելու դիմաց նրանից ցուցմունքներ են պահանջել:
Հիշեցնենք, որ Տիմոշենկոն հացադուլ է հայտարարել, նշելով, որ կալանավայրից Խարկովի հիվանդանոց տեղափոխելիս իր դեմ բռնություն է կիրառվել: Նրա փաստաբան Վլասենկոն ասել է, որ նախկին վարչապետին փաթաթել են սավանով եւ բռունցքով հարվածել փորին: Ուկրաինայի օմբուդսմենը հաստատել է, որ Տիմոշենկոյի մարմնի վրա բռնության հետքեր կան:
