Հայաստանի հանրապետական կուսակցության հետ «Ժառանգության» համագործակցության մասին մեղադրանքներն անբարոյականության վերջին սահմանն են, երբ նման մեղադրանքներ են արտահայտում այն քաղաքական ուժերը, որոնք եղել են իշխող կոալիցիայի մաս: Այդ մասին, այսօր` ապրիլի 27-ին, մամուլի ասուլիսում հայտարարել է «Ժառանգություն» կուսակցության անդամ Ստեփան Սաֆարյանը:
Ըստ նրա` «Ժառանգության» ընդդիմադիր լինել կամ չլինելը կորոշի հասարակությունը, այլ ոչ թե` քաղաքական հակառակորդները կամ լրատվամիջոցները: Նա նաեւ հիշեցրել է, որ վերջին 5 տարիների ընթացքում բազմաթիվ դեպքեր են եղել, երբ մի շարք հարցերում «Ժառանգություն» կուսակցությունն իշխանությունների միակ ընդդիմադիրն է եղել:
«Մենք տվել ենք գործող իշխանությունների գնահատականը, ներկայացրել ենք նրանց գործունեության արդյունքը, այդ գնահատականները վերաբերել են բոլոր կոալիցիոն կուսակցություններին: «Ժառանգությունը» մտադիր չէ մանրամասնել, թե երկրում իրադրության համար կոալիցիոն ուժերից որն ինչքան պատասխանատվություն է կրում»:
Սաֆարյանն ափսոսանք է հայտնել, որ տեխնիկական պատճառով որոշ ընտրական հանձնաժողովներում «Ժառանգության» ներկայացուցիչների ներառված չլինելը եւս դարձել է շահարկումների առարկա: Նա նշել է, որ Կենտրոնական ընտրական հանձնաժողովը տեղեկացված է այդ պատճառների մասին, հույս հայտնելով, որ համապատասխան կառույցները բարի կամք կդրսեւորեն, եւ իրադրությունը կկայունանա: Սաֆարյանը վստահեցրել է, որ եթե «Ժառանգության» ներկայացուցիչները չընդգրկվեն որոշ ընտրատեղամասային հանձնաժողովներում, կուսակցությունը դա կլրացնի իր վստահված անձանց եւ դիտորդների հաշվին: