Երեւանի եւ Հայաստանի մի շարք բնակավայրերի բնակիչներից NEWS.am-ին տեղեկություններ են հասնում տնային պայմաններում «խոզի գրիպով» հիվանդների բուժման մասին: Ինչպես վկայում են բազմաթիվ զանգերի հեղինակները, շատ դեպքերում տեսամասային բժիշկները A/H1N1 վարակի ակնհայտ ախտանշանների դեպքում արձանագրում են թոքերի սովորական բորբոքում եւ, հանգստացնելով հիվանդներին ու նրանց հարազատներին, կոչ են անում բուժվել տնային պայմաններում: Գործը չի հասնում անգամ վտանգավոր հիվանդության վարակման ճշտման անալիզ նշանակելուն:
Սակայն առավել ճշմարտախոս բժիշկները խոստովանում են, որ Երեւանի հիվանդանոցներում պարզապես հոսպիտալացման համար տեղեր չկան: Ավելին, վերջին ժամերին գործակալությանը հայտնի դարձավ «խոզի գրիպով» լաբորատոր հաստատված վարակման եւս երկու դեպքի մասին: Մի դեպքում՝ տատիկի եւ թոռնիկի առաջարկել են բուժվել տանը՝ անվճար դեղամիջոցներ չտրամադրելով:
Երեկ մայրաքաղաքում, հավաստի տեղեկություններով, մահացել է 1-ամյա մի երեխա, որ հիվանդանոց էր տեղափոխվել «խոզի գրիպի» ախտանշաններով: Տեղեկություններ կան նաեւ Գեղարքունիքի մարզի Սեւան քաղաքում մահացու 5 դեպքերի մասին: Մեր թղթակիցներին հայտնի է դարձել, որ 30-ամյա մի երիտասարդ, որ ժամանել էր Բելգիայից եւ մահացել է թոքաբորբ ախորոշմամբ, Հայաստանի աշխատանքի եւ սոցիալական ապահովության նախարար Մխիթար Մնացականյանի բարեկամն է:
Միեւնույն ժամանակ Հայաստանի առողջապահության նախարարության պաշտոնական ներկայացուցիչները շարունակում են պնդել, թե հանրապետությունում որեւէ խնդիր չկա «խոզի գրիպով» հիվանդներին որակյալ բժշկական օգնություն ցուցաբերելու գործում, իսկ դեղամիջոցները տրամադրվում են անվճար: Դեկտեմբերի 9-ի դրությամբ երկրում պաշտոնապես հաստատվել է վարակման 49 դեպք, իսկ աղմուկ հանած մահացու ելքերը գրվում են սեզոնային գրիպի եւ սովորական թոքաբորբի հաշվին:
