Հուլիսի 15-ին վթարի ենթարկված Թեհրան-Երեւան չվերթի ՏՈՒ-154 ինքնաթիռի զոհերի մնացորդներն ուղարկվել են ԴՆԹ ուսումնասիրություն անցնելու:

Նախօրեին ժամը 20:30-ի դրությամբ ինքնաթիռի զոհերի հարազատներն Իրանում ՀՀ դեսպանության ներկայացուցիչների ուղեկցությամբ ժամանել են Ղազվին քաղաքի մերձակայքում գտնվող ՏՈւ-154 ինքնաթիռի վթարի վայր, տեղեկացնում են կառավարական հանձնաժողովից:

Հարազատները հնարավորություն ունեցան անձամբ տեսնելու տեղի ունեցած աղետի հետեւանքները եւ ծաղիկներ են դրել ի հիշատակ իրենց մտերիմների ու բարեկամների: Նրանց տեղեկացվել է, որ վթարի ենթարկված ինքնաթիռի ուղեւորների հայտնաբերված մասունքները եւ անձնական պարագաներն արդեն տեղափոխվել են Թեհրան` ԴՆԹ-ի ուսումնասիրություններ կատարելու համար: Հարազատներին հնարավորություն է տրվել աղետի վայրից սափորներով հող բերել հայրենիք:

Երեկ ուշ երեկոյան զոհվածների հարազատները վերադարձել են Թեհրան:

Հիշեցնենք, որ հուլիսի 15-ին, Իրանի տարածքում, տեղական ժամանակով ժամը 11.33-ին վայր է ընկել «Caspian airlines»-ին պատկանող, 7908 չվերթն իրականացնող ուղեւորատար ինքնաթիռը, որում եղել են 168 մարդ, այդ թվում 15 հոգանոց ինքնաթիռի անձնակազմը: Նրանք բոլորը զոհվել են: