Ադրբեջանը մեծ ապագա ունի, Թուրքիան ցանկանում է ղարաբաղյան խնդրի կարգավորմանը հասնել քաղաքական եւ դիվանագիտական ուղիներով եւ կանի հնարավորը դրա համար: Այդ մասին ադրբեջանական APA-ին տված հարցազրույցում հայտարարել է Թուրքիայի նախագահ Աբդուլլահ Գյուլը:
Նրա խոսքով, տարածաշրջանում նորմալ հարաբերություններ հաստատելու համար Հայաստանին, առաջին հերթին, անհրաժեշտ է լուծել ղարաբաղյան խնդիրը: «Մեզ վշտացնում է այն փաստը, որ մեր մեկ միլիոն եղբայրներ փախստականներ են: Յուրաքանչյուրը պետք է իրեն դնի մյուսի տեղն ու օգնություն ցուցաբերի: Դա ազգային հարց է: Կուսակցությունները պետք է օգտագործեն դա իրենց նպատակների համար: Այդ հարցերում Ադրբեջանը պետք է իր հույսը դնի Իլհամ Ալիեւի վրա: Թուրքիան՝ իմ: Հայաստանը՝ Սարգսյանի: Հարգելի Մեդվեդեւն ու Օբաման պետք է այս հարցում ավելի մեծ աջակցություն ցուցաբերեն: Ես այդ հարցերի լուծման մեծ հույսեր ունեմ»,- ասել է Գյուլը:
Թուրքիայի նախագահը նկատել է, թե գործող ստատուս-քվոն Կովկասում որեւէ մեկին օգուտ չի կարող տալ, ոչ Ադրբեջանին, ոչ Թուրքիային, ոչ Հայաստանին: «Աշխարհը արագ փոխվում է, պետք է լուծել խնդիրները: Եթե շարունակենք սառեցնել խնդիրները սառնարանում, դրանք անսպասելիորեն կրկին կհայտնվեն»,- ասել է Գյուլը:
Նրա պնդմամբ, Մինսկի խումը լուրջ քայլեր է ձեռնարկում կարգավորման ուղղությամբ: «Բայց անցել է 18 տարի եւ, ցավոք, Մինսկի խումբը չի կարողացել կոնկրետ արդյունքի հասնել: Մենք ուզում ենք, որ խումբը մոտենա հակամարտության լուծմանը, բայց այսօր խմբի այցը տարածաշրջան «տուրիստական այցելություն» են անվանում: Ուստի նոր քայլեր են պետք»,- նկատել է Թուրքիայի նախագահը:
