Բորբոքելով Թբիլիսիի ռեւանշիստական ձգտումները` Վաշինգթոնում լիովին չեն գիտակցում պատասխանատվության չափը: Այդ մասին հայտարարել է Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշեւիչը:
Լուկաշեւիչը հիշեցրել է, որ «հենց ԱՄՆ-ի եւ Արեւմուտքի այլ երկրների ակտիվ քաջալերումը, ՆԱՏՕ-ում Վրաստանի ընդգրկվելու վերաբերյալ հայտնի հուսադրումները եւ արտասահմանից զինամթերքի զանգվածային մատակարարումներն էլ Սահակաշվիլիի մոտ ձեւավորել են ամենաթողության եւ անպատժելիության բարդույթը, որն էլ նրան մղել է հանցավոր արկածախնդրության Հարավային Օսիայում», հաղորդում է «ՎԶԳԼՅԱԴ»-ը:
Ըստ դիվանագետի` այսօր կատարվողն առաջացնում է «դեժավյուի զգացողություն»: «Դժբախտաբար, Վրաստանում տիկին Քլինթոնի արտահայտությունները հաստատում են, որ Վաշինգթոնում Կովկասի 2008 թվականի դեպքերից դաս չեն քաղել», – բացատրել է նա:
Հիշեցնենք, որ Հիլարի Քլինթոնը տարածաշրջանային այցի շրջանակներում հունիսի 5-ին այցելել էր Բաթում, որտեղ աջակցություն էր հայտնել ՆԱՏՕ-ում ընդգրկվելու Վրաստանի ցանկությանը եւ Ռուսաստանից պահանջել էր 2008 թվականի համաձայնագրի բոլոր կետերի իրագործում:
