ՆԱՏՕ-ն կոչ է անում թուլացնել ղարաբաղյան հիմնախնդրի սրացման հետ կապված լարվածությունը: Այդ մասին, հունիսի 11-ին, Թբիլիսիում հայտարարել է Հարավային Կովկասում եւ Կենտրոնական Ասիայում ՆԱՏՕ-ի հատուկ ներկայացուցիչ Ջեյմս Ափաթուրայը:
«Մենք հետեւում ենք իրադարձություններին եւ նշում ենք, որ վերջին շաբաթների ընթացքում կտրուկ սրվել են հարաբերություններն Ադրբեջանի եւ Հայաստանի միջեւ, դա հարուցում է մեր անհանգստությունը», - նշել է նա, հաղորդում է «Գռուզիա օնլայնը»:
Ափաթուրայն ընդգծել է, որ ՆԱՏՕ-ն չի մասնակցում Ղարաբաղի հիմնախնդրի կարգավորմանը, սակայն աջակցում է Մինսկի գործընթացին:
«Մենք դեմ ենք իրավիճակի սրացմանը, քանի որ դա տանում է դեպի նոր լարվածություն տարածաշրջանում: Մենք վեճերի խաղաղ կարգավորման կողմնակիցն ենք` կողմերի պահանջների բավարարման դեպքում», - ընդգծել է նա:
