Ռուսական ՆՏՎ հեռուստաալիքի լրագրող Ելենա Ժիգուլինան «Ձախ ճակատի» համակարգող Սերգեյ Ուդալցովին մեղադրել է, որ նա փակել էր իրեն իր տանը եւ ուժով պահել: Ուդալցովը պնդում է, որ Ժիգուլինան է ապօրինաբար ներխուժել իր տուն եւ էլի համապատասխան հայցով դատարան է դիմել:
Ըստ ՆՏՎ-ի վարկածի` աղջիկը ընդդիմադրի բնակարանի մոտ նկարահանում է իրականացրել, երբ Ուդալցովի մոտ են եկել խուզարկության համար: Նշվում է, որ լրագրողը բնակարան է մտել անձամբ համակարգողի թույլտվությամբ, սակայն փաստաբան Վիոլետա Վոլկովան եւ ընդդիմադրի կին Անաստասիան լրագրողուհուն մեղադրել են ապօրինի ներխուժման մեջ:
Ըստ ՆՏՎ-ի` Ժիգուլինայից փորձել են խլել տեսախցիկը եւ հեռախոսը, իսկ փաստաբանը բռնել է աղջկա ձեռքը: Ըստ այլ լրատվամիջոցների` Ս. Ուդալցովն աղջկան փակել է բնակարանում` պահանջելով ջնջել բոլոր լուսանկարները եւ տեսագրությունները, գրում է rbc-ն:
Մինչդեռ Ուդալցովը հայտարարում է, որ նա լրագրողին թույլ չի տվել բնակարան մտնել, եւ աղջիկը ստում է: «ՆԳՆ աշխատակիցներ Բոնդարյովը եւ Դոլգոպոլովը թույլ են տվել նկարահանած նյութը հանձնել ՆՏՎ-ի աշխատակիցներին` թեեւ լրագրողի կատարած հանցագործությունների վերաբերյալ Վոլկովայի հայտարարություններին», - ասում է Ուդալցովը, նշելով, որ կատարվածը համարում է սադրանք, գրում է «fontanka.ru»-ն:
Հիշեցնենք, որ հունիսի 11-ի առավոտյան Հետաքննիչ հանձնաժողովի աշխատակիցները խուզարկել են Ալեքսեյ Նավալնիի, Իլյա Յաշինի, Քսենյա Սոբչակի, Սերգեյ Ուդալցովի բնակարանները:
