Հայաստանի գյուղատնտեսության նախարարի պաշտոնակատար Սերգո Կարապետյանն այսօր` հունիս 12-ին, ընդունել է Պարենի եւ գյուղատնտեսության կազմակերպության (FAO) պատվիրակության ղեկավար Մեթյուն Քահանեի գլխավորած պատվիրակությանը: NEWS.am-ին Գյուղնախարարությունից հայտնեցին, որ նախարարը պատրաստակամություն է հայտնել օժանդակել Պարենի եւ գյուղատնտեսության կազմակերպության (FAO) պատվիրակությանը:
«2004 թվականից սկսելով համագործակցությունը FAO – ի հետ իրականացվել է 50 – ից ավելի ծրագիր եւ դրանցից որեւէ մեկը չի կարելի թերագնահատել իրենց կարեւորությամբ:Վերջին երկու տարում մեր համագործակցությունը նոր փուլ թեւակոխեց: Համոզված եմ , որ այն ավելի կխորանա եւ առարկայական կդառնա FAO -ի եւ գյուղատնտեսության նախարարության միջեւ կնքված քառամյա աջակցության ծրագրից հետո», - շնորհակալություն հայտնելով արդյունավետ համագործակցության համար` նշել է Սերգո Կարապետյանը:
Իր հերթին Պարենի եւ գյուղատնտեսության կազմակերպության (FAO) պատվիրակության ղեկավար Մեթյուն Քահանեն, մանրամասնելով իր ղեկավարած առաքելության գործառույթները, նշել է, որ ներկայում իրենց նպատակն է տեսնել իրականացված ծրագրերի գործնական ազդեցությունը ոլորտի զարգացման վրա: Իսկ հիմնական առաքելությունը կկայանա օգոստոսի վերջին-սեպտեմբերի սկզբին:
