Երեւանյան ջրաշխարհի աշխատանքը ընդհանուր ոչինչ չունի մայրաքաղաքի հյուսիսային թաղամասերի ջրամատակարարման հետ:
Այդ մասին, այսօր` հունիսի 15-ին, լրագրողներին հայտարարել է «Երեւան ջուր» ՓԲԸ-ի հաղորդակցման եւ սպառողների հետ կապի վարչության ղեկավար Գագիկ Մարգարյանը: Ըստ նրա` ջրաշխարհն օգտագործում է ոռոգման ջուր: «Խմելու ջուրն օգտագործվում է միայն ջրաշխարհի տարածքում ընդհանուր խմելու համար, եւ, բնականաբար, կազմում է միայն օգտագործվող ջրի փոքր մասը», – բացատրել է Մարգարյանը: «Մյուս կողմից, այժմ ջրաշխարհում աշխատում է նաեւ ձմեռային ատրակցիոնը: Սակայն ձմռանը Նոր Նորքի ջրամատակարարումը չի ընդհատվում»:
Նորքի զանգվածների ջրամատակարարման խնդիրը կարող է կապված լինել Կենդանաբանական այգու ձորի ջրօգտագործման հետ, որտեղ խմելու ջուրը կարող է օգտագործվել այգիները ջրելու համար, մեկնաբանել է Մարգարյանը: Բացի դրանից, հիշեցրել է նա, 2010 թվականի վերջին ընկերությունն ավարտել է ջրամատակարարման նոր գծի կառուցումը Կաթնաղբյուրից մինչեւ Երեւանի կենտրոն` որպես նոր այլընտրանքային գիծ:
«Երեւան ջուր» ՓԲԸ –ն (ֆրանսիական «Veolia Generale des Eaux» ընկերության դուստր-ձեռնարկությունը) Երեւանի ջրամատակարարման եւ կոյուղատար համակարգի օպերատորն է 2006-2015 թթ. ժամանակահատվածում` ըստ 2005 թվականի դեկտեմբերին Հայաստանի եւ «Veolia»-ի միջեւ կնքված պայմանագրի: