Վրացական ընդդիմությունը պնդում է, որ Ասպինձայի Խերթվիսիում կառուցվում է ոչ թե հիդրոէլեկտրակայան, այլ ատոմակայան:
Երկրի նախագահ Միխայիլ Սահակաշվիլին խաղաղ ատոմը նվաճելու իր ցանկության մասին վաղուց էր խոսում: Սակայն ճապոնական «Ֆուկուսիմա» ԱԷԿ-ի վթարից հետո այդ ծրագրերը հետաձգվեցին: Տեղական ընդդիմադիրներն այժմ պնդում են, որ Վրաստանում ատոմակայան այնուամենայնիվ կլինի: Ընդ որում`նրա կառուցման բանակցությունները տարվում են Ադրբեջանի եւ Թուրքիայի մասնակցությամբ:
Ինչպես GTimes-ին հայտնել է «Երովնուլեբի» շարժման պատվավոր նախագահ Դավիդ Սոկոլովը, բանակցությունները գաղտնի են տարվում, սակայն թուրքական կողմը պահանջում է հրապարակել դրանք եւ բացահայտ սկսել ատոմակայանի շինարարությունը: Իսկ վրացական կողմն էլ կտրականապես պահանջում է չհրապարակել այդ բանակցությունների առարկան: «Այնտեղ արդեն իրականացվել են 50 միլիոն դոլարի աշխատանքներ… Աշխատանքն իրականացրել է ավստրիական ընկերությունը; Օրերս սպասվում է արդեն շինարարությունը, սակայն վրացական կողմը պատրաստվում է հայտարարել, որ իբր դա ատոմակայան չէ, այլ հիդրոէլեկտրակայան»:
Բնապահպանական իրավունքի կենտրոնի ղեկավար Նիկոլոզ Մժավանաձեն նշել է, որ հաճախ երկրի իշխանությունները որեւէ վիճահարույց գաղափար են առաջ քաշում, փաստորեն ստուգելով, թե որքան է դրան պատրաստ հասարակությունը, եւ չի բացառել, որ այժմ նույնն է տեղի ունենում: