Հայտնի ռուս հեռուստալրագրող Վլադիմիր Պոզները հեռանում է «Դոժդ» հեռուստաալիքի «ՊարֆյոնովՊոզներ» նախագծից: Այդ մասին հեռուստաալիքի եթերում անձամբ հայտնել է Պոզները: Պատճառ է հանդիսացել Առաջին ալիքի ղեկավարության կողմից լրագրողին առաջադրած պայմանը:
«Հավանաբար, սեպտեմբերին մենք չենք շարունակի: Առաջին ալիքի ղեկավարությունն ինձ պայման է առաջադրել, եւ ես ընտրել եմ Առաջին ալիքը», - եթերում հայտարարել է Վլադիմիր Պոզները: Ավելի ուշ Պոզների ասածը հայտնվել է «Դոժդ» հեռուստաալիքի թվիթերում: Ալիքի ղեկավարությունից պաշտոնական մեկնաբանություն չի հետեւել:
Հեռուստանախագիծը, որի հիմքում երկրի հասարակաքաղաքական կյանքի քննարկումն էր, գոյատեւեց երկու ամսից ոչ ավելի: Հիշեցնենք, որ նախապես նման նախագծի գաղափարը Առաջին ալիքում ծագել էր դեռեւս 2004 թվականին` «Նամեդնի» ծրագրի փակվելուց հետո: Սակայն այն ժամանակ նախագիծը չի իրագործվել, ըստ «Կոմերսանտի»` այդ գաղափարը հավանություն չի ստացել Կրեմլում:
Ըստ Պոզների` Առաջին ալիքի ղեկավարությունը հղում է անում միջազգային պրակտիկային, որի դեպքում մի քանի ալիքներում աշխատելը չի ողջունվում:
