Թուրքական ռազմաօդային ուժերի օդանավը խփած սիրիական զինվորականների գործողությունները վտանգ են ներկայացնում տարածաշրջանի խաղաղության եւ անվտանգության համար: Նման մոտեցում է ներկայացված ՄԱԿ-ի ԱԽ Թուրքիայի ուղարկած դիմումում:
Թուրք երկու օդաչուների վախճանին հանգեցրած հարձակումը թշնամական գործողություն է սիրիական իշխանությունների կողմից, որն սպառնում է Թուրքիայի ազգային անվտանգությանը, ասվում է դիմումի մեջ:
Թուրքիան ԱԽ-ից ոչ մի անհապաղ գործողություն չի պահանջում, հայտնում է «Ռոսբալտը»` հղում անելով AFP-ին:
Նախօրեին թուրքական փոխվարչապետ Բյուլենտ Արինչը հայտարարել էր, որ Թուրքիայի իշխանությունները չեն պատրաստվում պատերազմել Սիրիայի դեմ խփված օդանավի պատճառով: Միաժամանակ նշել էր, որ Անկարան մտադիր չէ այդ հարցը թողնել առանց հետեւանքների:
Մինչդեռ հունիսի 25-ին հայտնի էր դարձել, որ Սիրիայի օդային ուժերը եւս մեկ թուրքական օդանավ էին հրաձգության ենթարկել:
Ինչպես ավելի վաղ հայտնել էր NEWS.am-ը, հունիսի 22-ի կեսօրին Թուրքիայի ռազմաօդային ուժերի օդանավն անհետացել էր Միջերկրական ծովի ջրերում: Մալաթիայից օդ բարձրացած օդանավի հետ կապը կորել էր Հաթայ նահանգի հարավարեւմտյան հատվածում: Ավելի ուշ տեղեկություն էր հայտնվել, որ օդանավը խփվել է Սիրիայի զինվորականների կողմից:
Սիրիայի իշխանություններն ընդունել են, որ խփել են կործանիչը, եւ հայտնել էին, որ օդանավը խախտել էր Սիրիայի սահմանը:
Թուրքիայի ԱԳՆ-ի ղեկավար Ահմեդ Դավութօղլուն հայտարարել էր, որ օդանավը խփվել էր միջազգային օդային տարածքում, իսկ նրա բեկորներն ընկել էին Սիրիայի տարածքային ջրերը: Ըստ նրա`օդանավը կատարել է թեստային եւ ուսումնական թռիչք,նրանում զենք չի եղել, իսկ թռիչքի մասին Սիրիան նախապես տեղյակ է եղել:
Թուրքիան ՆԱՏՕ-ի Խորհրդի արտահերթ նիստ է գումարել` Վաշինգթոնի պայմանագրի 4-րդ հոդվածի համաձայն, ըստ որի դաշինքի ցանկացած անդամ խորհրդակցություն կարող է հրավիրել, եթե նրա տարածքային ամբողջականությունը, քաղաքական անկախությունը կամ անվտանգությունն սպառնալիքի տակ են գտնվում:
