Թբիլիսիի Լիլո արվարձանում հուլիսի 4-ի գիշերը քլորի արտահոսք է տեղի ունեցել 800 լ-անոց պահեստից: Տուժել է 70 մարդ:
Ինչպես հայտնում են վրացական լրատվամիջոցները, տուժածներից մեկի` 18-ամյա Լաշա Նարիմանիձեի վիճակը բժիշկները գնահատում են ծայրահեղ ծանր: Պատանին ասթմա ունի, որն էլ հանգեցրել է նման ծանր հետեւանքների:
Քլորի արտահոսքից տուժածներին հուլիսի 4-ի գիշերը հիվանդանոցներում այցելել են Վրաստանի նախագահ Միխայիլ Սահակաշվիլին եւ առողջապահության նախարար Զուրաբ Չիաբերաշվիլին, որը խոստացել է, որ բուժման բոլոր ծախսերն իր վրա կվերցնի պետությունը:
Պահեստի տերը մասնավոր ջրբաշխ ընկերություն է Իրանից: Կատարվածի պատճառները պարզվում են: Տարածքը շրջափակված է, տեղում աշխատում են հրշեջ ծառայությունները, շտապօգնության ջոկատները, ոստիկանությունը: Կատարվում են արտահոսքի հետեւանքների վերացման աշխատանքներ, հայտարարել են ԱԻ քաղաքային ծառայության ներկայացուցիչները:
