Մարդու իրավունքների պաշտպան Կարեն Անդրեասյանը եւ Հայաստանում Գերմանիայի դեսպանի ժամանակավոր պաշտոնակատար Քրիստոֆ Բրոյնիգը այսօր` հուլիսի 4-ին ստորագրել են համագործակցության հուշագիր, որն ուղղված է ազատազրկման վայրերում խոշտանգումների եւ վատ վերաբերմունքի զոհերին իրավական օժանդակություն տրամադրելուն։
Հուշագրի շրջանակներում Գերմանիայի դեսպանության ներդրումը կազմում է 22 հազար 300 եվրո, որն իր մեջ ներառում է շրջիկ իրավաբանների ներգրավում, որոնք իրավական խորհրդատվություն կտրամադրեն ազատազրկման վայրերում խոշտանգումների եւ վատ վերաբերմունքի զոհերին։ Նախագիծն իրականացվում է «Մարդու իրավունքների տուն» հասարակական կազմակերպության հետ համատեղ։
ՄԻՊ գրասենյակից հայտնում են, որ վերջին մեկ ամսվա ընթացքում սա արդեն երրորդ հուշագիրն է, որն ուղղված է առանձին խոցելի խմբերի աջակցությանը։ Հուշագրեր են ստորագրվել ՄԱԿ-ի փախստականների հարցերով գերագույն հանձնակատարի հայաստանյան գրասենյակի հետ՝ ուղղված Հայաստանում փախստականների իրավունքների պաշտպանությանը վերաբերող մի շարք խնդիրների լուծմանը, ինչպես նաեւ Շվեյցարիայի դեսպանության հետ՝ կանանց եւ երեխաներին բռնությունից պաշտպանելու նպատակով։