2004թ-ին Պաղեստինի նախկին առաջնորդ Յասեր Արաֆաթի մահվան պատճառն արյան զեղումն է եղել: Այս մասին ասվում է ֆրանսիական զինվորական «Փերսի» հոսպիտալի հաշվետվության մեջ: Հենց այդ բուժհաստատությունում է Արաֆաթն անցկացրել իր վերջին օրերը: Փաստաթուղթը հրապարակվել է Արաֆաթի հիմնադրամի կայքում:
Ըստ բժիշկների` Արաֆաթը տառապել է աղիների բորբոքումից, ունեցել է նյարդային եւ արյունատար համակարգի հետ կապված խնդիրներ: Սակայն ֆրանսիացի բժիշկները նշել են, որ իրենց չի հաջողվել պարզել Արաֆաթի հիվանդության սկզբնական պատճառը:
Արաֆաթը մահացել է 2004 թ. նոյեմբերին Փարիզում` 75 տարեկանում: Նրա մահվան պատճառը պարզ չէ: Շատ պաղեստինցիներ սկզբում ասում էին, թե նա թունավորվել է: Քաթարական «Ալ Ջազիրա» հեռուստաալիքը հաղորդել էր Արաֆաթի անձնական իրերում պոլոնիում-210-ի բարձր խտության հայտնաբերման մասին: 2006թ-ին Սիրիայի նախագահ Բաշար Ասադը Իսրայելի հատուկ ծառայություններին մեղադրել էր Արաֆաթի սպանության մեջ, Իսրայելը հերքել էր մեղադրանքները: