Ֆրանսիայի նախագահ Ֆրանսուա Օլանդն ազգային տոնին`Բաստիլի գրավման օրը, անցկացրել է իր առաջին շքերթը:
Սկզբում ելույթ են ունեցել ռազմածովային ուժերի նվագախմբի երաժիշտները: Այնուհետեւ Հանրապետական հանդիսավոր գվարդիայի 12 ձիավորներ հյուրերին շքեղ ներկայացում են ցույց տվել` գվարիդիայի սիմֆոնիկ նվագախմբի ուղեկցութամբ: Շքերթը բացել են Ֆրանսիայի ռազմաօդային ուժերի 9 օդանավեր` երկինքը գունավորելով ֆրանսիական դրոշի գույներով: Ելիսեյան դաշտերի երկնքով թռել են 60 օդանավեր, այդ թվում նաեւ «Ռաֆայել» կործանիչներ:
Շքերթին մասնակցել են նաեւ գերմանական ծովային 291-րդ ջոկատի զինվորականները, որոնք 2010 թվականի դեկտեմբերից ծառայում են Ստրասբուրգում: Շքերթի հետիոտնային փուլին մասնակցել են 5 հազար զինծառայողներ, ռազմական եւ ոստիկանական ուսումնական հաստատությունների ուսանողներ, հրշեջներ եւ ոստիկանության աշխատակիցներ:
Հիշեցնենք, որ այսօր Ֆրանսիայում եւ ամբողջ աշխարհում նշվում է Բաստիլի գրավման օրը: Բաստիլի շրջափակումը եւ գրավումը մարդկության պատմության կարեւորագույն իրադարձություններից է: Այն հեղափոխական ճանապարհով քաղաքական ազատագրման հասնելու խորհրդանիշ է դարձել:
