Ըստ վերջին տվյալների` ամերիկյան Կոլորադո նահանգի Դենվերի մոտ գտնվող Ավրորա քաղաքի կինոթատրոնի հրաձգության արդյունքում վիրավորների թիվը հասել է 70-ի:
Ինչպես տեղական ոստիկանության պետ Դեն Օութսին վկայակոչելով հաղորդում է gazeta.ru-ն,զոհվել է 12 մարդ:
70 վիրավորներից 11-ի վիճակը օրհասական է, մեջբերում է CNN-ը:
Ձերբակալված 24-ամյա հանցագործը, գրում է «Կոմսոմոլսկայա պրավդան», հարձակմանը երկու ամիս էր նախապատրաստվել: Նա գնել էր զենք եւ հանգամանալից ծրագրեր կազմել: Ջեյմս Հոլմսն հասցրել էր ձեռք բերել 4 միավոր զենք եւ 6 հազար փամփուշտ: Նրա հագին զրահապատ բաճկոնակ եւ հակագազ են եղել: Վերջինս հագել էր, մինչեւ արցունքաբեր գազ բաց թողնելը:
Ջեյմսն իրեն երեւակայել է պատմության ամենագլխավոր չարագործներից մեկը` «Ջոքերը»: Նա նույնիսկ մազերն է ներկել:
Ինչպես ավելի վաղ հայտնել էր NEWS.am-ը, Ավրորա քաղաքի կինոթատրոնում «Խավարի ասպետը. Լեգենդի վերածնունդը» ֆիլմի պրեմիերայի ժամանակ տեղի բնակիչ Ջեյմս Հոլմսը հանդիսատեսների վրա կրակ էր բացել: Նա դահլիճ էր մտել, երբ արդեն ֆիլմն արդեն սկսվել էր, եւ լուռ կրակ էր բացել: Ֆիլմի եւ իրականության հնչյունները միահյուսվել էին, այդ պատճառով էլ մարդիկ միանգամից չէին հասկացել, թե ինչ է կատավում: Երբ հանդիսատեսները վազել են ելքի մոտ, սկսվել է հրմշտոցը: Տղամարդը ծխաբեր պայթուցիկ է նետել, այնուհետեւ անվրդով կրակ է բացել հանդիսատեսների վրա, որոնք վազում էին դեպի ելքը: