Օգոստոսի 11-ին Թայվանում տեղի է ունեցել լեսբուհիների բուդդայական հարսանիք: Ամուսնացողները 30-ամյա Ֆիշ Խուան եւ Յու Յատինն են:
Արարողությունը տեղի է ունեցել Թայվանի հյուսիսային Թաոյուան նահանգի վանքում` Բուդդայի արձանի մոտ: Սպիտակ հագուստ հագած կանայք հավատարմության երդում են տվել, իսկ մատանիների փոխարեն` փոխանակվել են համրիչներով: Արարողության ընթացքում մոտ 300 բուդդիստներ նորապսակների պատվին սուտրաներ են արտաբերել:
Կանայք ստացել են բուդդիստ միանձնուհիների եւ թայվանական համալսարանի գիտնական Շի Չաոխույի օրհնությունը:
Չաոխույը իր հիացմունքն է հայտնել Ֆիշ Խուանի եւ Յու Յատինի հանդեպ, ովքեր, չվախենալով հասարակական կարծիքից, պայքարում են իրենց իրավունքների համար:
Կանանց ծնողները հարսանյաց հանդեսին չեն մասնակցել, հայտնում է «Լենտա.ru»-ն` վկայակոչելով на Agence France-Presse-ին:
Բուդդիզմը չի արգելում միասեռական հարաբերությունները, սակայն կրոնական շրջանակներում այս հարցի շուրջ դեռեւս չկան միանշանակ կարծիքներ: Ներկայումս բուդդիստական միասեռ ամուսնություններ գրանցվում են միայն ԱՄՆ-ում: Թայվանը Արեւելյան Ասիայի այն երկրներից է, որտեղ հանդուրժողականությամբ են վերաբերում միասեռականության հարցին:
